Minister Dangui Oduber feliz cu Mein Schiff 1 a haci su prome bishita na Aruba

ORANJESTAD (AAN): Diahuebs Minister di Turismo Sr. Dangui Oduber tin e placer di por anuncia e yegada di Mein Schiff 1 cu ta un linea crucero Aleman TUI Cruises.

   E crusero aki ta yega Aruba pa di prome biaha (inaugural call) y ta hunga un rol hopi importante den e recuperacion di Aruba su turismo crusero. Diahuebs mainta Aruba a habri dia cu 3 barco crusero mara na nos waf.

   Mein Schiff ta un barco crusero basta nobo, apenas na aña 2018 el a cuminsa opera.  E barco crusero tin un capasidad di casi 3 mil turista crucero y 1100 tripulante. E ta 315 meter di largo y den e linea crusero di Mein Schiff e ta esun di mas largo. E ta conta cu 12 restaurant abordo, 17 bar y lugar pa descansa, e ta un barco crusero cu tin algo pa tur hende.

   Minister Oduber ta recorda pueblo cu ta apenas na juni 2021 cu Aruba a ricibi su promer linea crucero desde maart 2020. Pa mas cu 1 aña y 3 luna Aruba no a ricibi ningun barco crucero. Desde cu Aruba a habri su frontera e schedule di barco a keda crece gradualmente.

   Den luna di oktober tabata tin 9 calls, den luna di november tin un total di 31 calls y december ta spera un total di 38 calls. Minister Oduber ta sigura comunidad di Aruba cu Ministerio di Turismo, APA y ATA ta keda traha pa no solamente acerca mas linea crusero pa bin Aruba pero pa tambe aumenta e ocupacion di esnan cu tin caba.

   Aruba tabata e prome destinacion cu e linea cruceronan a cuminsa den Caribe. Cu esaki Aruba ta sigui continua pa yega 100% di e recuperacion di nos turismo crucero. Sigur esaki ta crea oportunidadnan pa nos economia, pa e cuponan di trabao, pa tour operators, pa taxistnan, pa restaurantnan y tiendanan di retail.

   Finalmente Minister Dangui Oduber ta manda felicitacion pa APA, ATA y henter pueblo di Aruba cu e yegada di Mein Schiff aki na Aruba.