Publico baliando pero cu lagrima na wowo
- Su musica a resona atardi y anochi riba caya
- Awe mes e entiero lo tuma lugar na Misa Santa Cruz
ORANJESTAD (AAN): For di trempan caba, autonan a cuminza staciona a lo largo di Avenida Milio Croes como tambe Vondellaan na Playa, pa asina mira e parada di despedida di Robert y su Solo Banda Show, y integrantenan di Los Laga Bai, kendenan a tene un mini-parada di Carnaval como pa 30 aña largo e legendario cantautor aki a sa di entretene su comunidad durante parada, y cu su musica.
Diferente cantante local a uni cu e trailer di Solo Banda Show, pa asina reforza cancionnan popular cu semper a resona danki na e liderato di e icono musical di Aruba cu a bira conoci local- y internacionalmente.
Ora cu e parada a yega na e comienzo di Plaza Betico Croes, e integrantenan di Los Laga Bai a forma un circulo na honor di Robert, cu algun disfraz poni mey-mey di caminda, y asina nan a balia rond di dje pa demostra nan aprecio pa e gran musico Arubiano.
Despues di esey, a cuminza e parti oficial unda a utiliza e fachada di Cas di Cultura como escenario principal. E caha di morto a wordo poni net dilanti lobby. E truck musical di Solo Banda Show a keda staciona riba Vondellaan cu un escenario improvisa poni eynan pa cantantenan local a rindi homenahe.
Maestronan di ceremonia pa e anochi tabata Edjean Semeleer y Ivan Kelie Jr., y asina a laga diferente persona dirigi palabra, incluyendo Ministro Gerlien Croes. Por a mira presencia di algun Parlamentario, directornan di compania, y tambe diferente musico cu no a presenta, pero si a pasa dilanti e caha pa despedi di Aruba su musico stima.
Caya Robert Jeand’or: Riba escenario, a scucha cantamento di e.o. Tattoo, Papito Rafael, Robert Maduro, Danny Koolman, Jonathan Croes, Giovanni Tromp, Ataniro, Marlon Willems, Jeffrey Kelly,
E cantante Danny Koolman a trece dilanti algo cu el a yega di papia di dje na numeroso ocasion caba ta su idea pa duna un caya na Aruba e nomber di ‘Caya Robert Jeand’or’, y e ta mustra cu Aruba tin di honra su legendario musico talentoso cu a sacudi pueblo local- y internacionamente cu un caya.
Publico a para cu pasenshi den rij pa despedi di Robert den su caha di morto, y despues baha pa condoleer demas famia, yiunan, y esposa Vivian. Un delegacion Dominicano cu autorizacion a pone un bandera di Republica Dominicana riba e caha di morto.
Awe Diasabra 27 di September, e restonan mortal lo ta reposa den misa Inmaculada Concepcion na Santa Cruz, for di 1:00 pm pa 4:00 pm. Despues di esey lo bay Aurora Funeral Home, unda cremacion lo tuma lugar den seno familiar. Prome cu e yega Misa, lo bay cu ne cu un recorido unda e.o. lo bay para na Veld di Arsenal, lo pasa na Kapel di Alto Vista, y lo pasa tambe dilanti cas di Robert na Tanki Leendert.
Famia Mansur y DIARIO ta expresa palabranan di profundo condolencia na famia, amigo- y fanaticonan di Robert Jeand’or.
