Minister di Enseñansa, Gerlien Croes:
- Ta trahando riba incentivo pa atrae studiantenan den enseñansa
ORANJESTAD (AAN): Minister di Enseñansa, Gerlien Croes, a declara den un entrevista reciente cu DIARIO cu su ministerio ta ricibi varios peticion pa dispensacion di docentenan. Segun e minister, e mesun sistema di dispensacion ya tabata den uzo prome y durante e periodo di e minister di enseñanza anterior, y esaki lo continua tambe.
E dispensacion ta permiti cu docentenan cu a yega na edad di pensioen por sigui duna les te cu nan 67 aña, mientras cu nan ta keda den un rol di docente, dus duna les, y no den un otro funcion administrativo of diferente den e sistema di enseñasa. E sistema ta sirbi manera un solucion pa e escasez di maestro actual, especialmente pa cubri materia of vaknan den cual tin falta di docente.
Minister Croes a enfatisa tambe cu, hunto cu Minister di Economia, Geoffrey Wever, ta analisando e aspecto fiscal pa crea mas incentivo y menos peso fiscal pa nos pensionadonan cu ainda ta trahando pa pais Aruba. Tambe, kier bin cu pakete di incentivo pa atrae studiantenan bek pa traha na Aruba den e ramo di nan estudio, particularmente esnan cu ta bay studia pa bira docente.
E escasez di docente ta un problema no solamente na Aruba pero rond mundo pa cua no ta premira un solucion rapido. Na Hulanda tambe, e minister ta menciona, e problema di escasez di docente ta hopi grandi. Y e reto pa Aruba ta grandi tambe, pa competi cu Bonaire y Hulanda no ta facil.
Actualmente tin hopi persona cu no a haci e estudio pedagogico, pero tin e conocemento necesario, ta duna les mientras cu nan no ta bevoegd. Pero si no a aproba dispensacion pa e personanan aki duna les, lo no tin docente pa yena e espacionan aki.
“E ta un desaroyo preocupante, pero e no ta un reto cu Gobierno di Aruba so tin. E ta un reto cu nos ta wak mundial y nos mester bay wak eventualmente con nos ta haya nos mes ta nabega e barco den e situacion aki”, Minister Gerlien Croes a expresa.
