Misha Raymond:
ORANJESTAD(AAN): Despues cu Diaranzon e votacion riba e ley cu ta regarda matrimonio di mesun sexo a caba 10-10 cu ta nifica cu esaki no a wordo aproba, parlamentario di Raiz, Misha Raymond a expresa su desapunta.
E iniciativa di ley tabata di Miguel Mansur, Marisol Lopez, Aquanette Gun y Raymond, pero debi na e hecho cu parlamentario di MEP Shailiny Lee a abstene di vota un biaha mas, pa di dos biaha ley no a wordo aproba y mester warda riba e decision den Casacion.
“Mi ta haya lamentable cu bo ta abstene di vota riba e ley, mirando cu bo voto tabata uno decisivo pa cu e ley aki”, segun e parlamentario di Raiz.
El a indica cu e parlamentario di MEP mester a scoge pa vota si of no.
“E hecho cu e ley a wordo rechaza ta nifica cu Parlamento no a tuma un decision riba esaki y mi no sa ki tipo di señal esey ta manda pa e region, pa Hulanda, pa Caribe”.
E mensahe cu esaki ta manda pueblo ta cu e mesun Parlamento no por a fiha un posicion riba e tema aki.
Den tiki palabra mi ta haya esaki lamentable y pa ta honesto mi ta desapunta, segun Raymond.
El a sigui bisa cu awor tin tur indicacion cu Casacion ta bay indica cu nos leynan ta discriminatorio, locual ta nifica cu si cassatie dicidi cu parehanan di mesun sexo por casa na Aruba, tin cu wak con ta bay cumpli cu loke corte di casacion ta bisa.
“Si cassatie bisa cu mester permiti matrimonionan di mesun sexo, Gobierno mester cumpli”.
Lo tabata bunita si nos mesun Parlamento por a vocifera su mes riba e tema aki cu un si of no, pero awor nos tin cu laga tur cos den man di corte di casacion, segun e parlamentario di Raiz.
