Minister Geoffrey Wever:
ORANJESTAD (AAN): Diahuebs mainta a tuma lugar den Parlamento di Aruba e reunion pa cambio den regulacion di Huurcommisie. Ta trata di un cambio di ley den e titulo 7.4 di e Codigo Civil di Aruba (BWA) cu desde 1 september 2021 ta e titulo tocante huurrecht. E tarea, podernan y composicion di e huurcommissie ta wordo regula den titulo 7.4.4 BWA (artt. 7:253 e.v.).
Huurcommissie tin un funccion importante pa eherce como mediador den casonan di disputa entre huurder y verhuuder.
E meta di e cambio di ley nobo ta pa promove e funcionamento y profesionalisacion di e huurcommissie. Cu e ley nobo, e nominacion di e miembronan y secretario ta wordo mara na un termino; nombracion no ta pa un termino indefini mas. E punto aki den e ley ta pa segura cu regularmente tin "sanger nobo" den e comision di conseho, sin afecta e continuidad den e comision. Segun e ley aproba, e presidente, e otro miembronan y e secretaria por wordo nomina pa un termino di cuater aña y por ser renomina pa un solo termino extra di cuater aña.
Tambe a ancra e rekisitonan pa por bira miembro of secretario di huurcommissie den e ley, fortificando cu Huurcommissie por keda funcciona profesionalmente, dirigi pa personanan capacita den nan area di experticio, sea experticio huridico of di engeneria/construccion.
E ley ta segura tambe cu e minister di asuntonan economico, a traves di un LBHAM, tin e herment legal pa por dirigi Huurcommissie. Prome cu esaki, aunke e minister di asuntonan economico ta responsabel pa Huurcomissie, huridicamente e tabata limita den con e por efectua maneho dentro di e comision. Cu e decreto aki nos pais den futuro por establece reglanan adicional, manera con e organisacion di huurcommissie mester opera y raporta na e minister encarga, y pues tambe na parlamento.
Tur e pasonan aki ta pa segura cu Huurcommissie ta bira mas accesibel pa personanan, pa tin procesonan structura den nan luga pa por segura tambe trato igual di tur caso di disputa. Asina Huurcommissie por brinda miho servicio y efectua nan trabou cu mas deligencia. Minister Wever ta a gradici tur esnan cu a yuda traha riba e ley aki pa por logra haci esaki posibel, y miembronan di Parlamento pa e sosten unanime.
