Realidad politico Hulandes conoce reparticion di poder politico
*Un partido Arubano ta exigi union interno cu ta stroba democracia
*Participante na eleccion Parlamento no por bira Ministro ni viceversa
ORANJESTAD (AAN) — Na Aruba loke a pasa na 2014, hamas mester ripiti y e unico forma pa realiza esaki ta dor di tene eleccion separa pa Parlamento y eleccion pa Ministronan, cu ta forma un solo curpa politico den nan cas di partido.
Caso Avestruz ta exigi mucho mas investigacion riba diferente tereno cu solamente atende cu un caso criminal den cual den seno di un partido, corupcion por a brota na un forma historico.
E union di interesnan cu ta necesario pa un partido por bira popular den comunidad y sin un agenda dirigi, crece na e forma cu AVP a crece como partido na Aruba na 2009, ta sumamente sorprendente mas ainda pasobra Gabinete Mike Eman a nace directamente despues di e Scandal di Fondo Desaroyo Nobo San Nicolas, cu a desaparece for di agenda politico di Aruba na momento cu Mike Eman a lanza su mision imposibel di deshaci di BBO.
DIARIO den combersacion cu expertonan riba nan tereno, ta mustra cu no tin hustificacion directo pa e forma cu Mike Eman a convence Pueblo di Aruba cu un tempo di oro a cuminsa pa Aruba, cu a wordo hiba na un desastre nacional total riba tereno financiero pero tambe den caos gubernamental.
“E rapport Bo Aruba ta prueba kico a pasa cu e placa di Pueblo di Aruba uni na e debe nacional cu a pone Aruba bou supervision, mientras Mike Eman a logra un triunfo electoral aplastante na momento cu Aruba tabata zink,”informantenan ta splica.
Expertonan na diferente ocasion a haci uzo di e poder di comunicacion di DIARIO, pa splica cu realidad politico di Aruba ta exigi pa e poder di Parlamento ta separa pa e poder di Gobierno na Aruba.
“Gobierno Mike Eman a entrega prueba na Aruba di mas cu capacidad pa hiba un maneho financiero cu a destrui e pais y a haci necesario pa Hulanda deshaci di Status Aparte di Aruba cu introduccion di supervision di CAFt,”informantenan ta trece dilanti.
Segun expertonan, durante e periodo 2009 pa 2014, ora Hulanda a interveni, no por papia di un Gobierno democratico na Aruba pasobra base di democracia ta, cu henter Pueblo sin discriminacion segun color politico, tin mes derecho riba bon gobernacion, cu no ta acepta e sistema discriminatorio di “family and friends”, cu ta base di e caso Avestruz.
Pueblo di Aruba na momento cu e caso Avestruz tabata culmina, tabata completamente den gara di tur loke ta contra e concepto democratico pasobra e base di democracia a wordo completamente silencia pa sirbi interes di “family and friends”.
E motibo principal cu esaki por a socede ta keda, e forma di eleccion na Aruba, cu ta bon na un pais grandi na Hulanda, cu conoce diferente formulanan di gobernacion.
Na Hulanda tin eleccion pa Provinciale Staten. Representantenan di Provincianan, cu ta controla e asina yama “Gedeputeerde Staten”.
Miembronan eligi di Provinciale Staten na provincianan ta dicidi pa e maneho di provincianan riba diferente tereno.
Nan tin comisionnan riba diferente tereno y ta eligi miembronan di Eerste Kamer Hulandes.
Na Hulanda, Eerste Kamer tin un tarea di legislador cu ta controla Gobierno y e calidad di legislacion na e pais.
Leynan mester wordo revisa den Eerste Kamer despues di wordo atende den Tweede Kamer, cu ta ricibi e intencionnan di Gobierno Hulandes.
Pero esaki no ta tur. Gemeentenan na Hulanda tambe ta scoge nan Gemeenteraad cu ta encarga cu asuntonan directo di nan votadornan.
Pues e totalidad di “check and balances”politico na Hulanda ta sobresali den un sistema basico cu ta diferente for di e sistema di Aruba cu ta depende di eleccion pa Parlamento, cu na su turno ta dicidi con gobernacion lo ta.
Na 2014 e resultadonan a rementa den man di Aruba, cu a baila y entrega Gobierno Mike Eman mayoria, cu a bira condena pa Aruba, cu a scapa pasobra intervencion di Reino tabata posibel.
Expertonan ta mustra cu ora papia di Caso Avestruz ta papia di mucho mas cu di un caso di corupcion serio den cual reglanan di democracia a wordo elimina.
Parlamento di Aruba e tempo tabata completamente domina pa e euforia di Mike Eman, cu tabata dirigi henter e panorama politico na Aruba na un forma cu Pueblo no a nota cu Aruba tabata den man di destruccion democratico.
Informantenan ta splica cu e unico forma pa evita ripiticion di loke a pasa cu Aruba na man di Gabinete Eman ta, pa yega na formula pa separa eleccion di Parlamento for di eleccion di Ministronan, sigur si manera tabata e caso na 2014, partido AVP tabata Mike Eman y su grupo cu tabata dicidi.
