Prome Minister Evelyn Wever-Croes:
*Gobierno no por interveni of revoca e decisionnan di companianan estatal
ORANJESTAD (AAN): Despues di informacionnan cu a wordo duna durante e Conferencia di Prensa di Gobierno di Aruba Dialuna 15 di juli, miembronan di prensa a haya oportunidad pa haci pregunta na Prome Minister Evelyn Wever-Croes. E mandatario a duna su contesta riba un pregunta basta interesante cu a trata e nombramento di señor Nuboer como e director nobo di Arubus.
Basa riba e pregunta aki, Prome Minister a indica cu e nombramento di señor Nuboer ta causa controversia. E situacion cu Arubus ta aden awor ta delicado y mester un director di un reputacion y integridad intachabel pa lidera e compania. Tanto internamente pa haya e respet di e empleadonan y externamente unda tur stakeholder mester atende cu e compania pa soluciona problemanan y pa e motibonan ey Gobierno a pidi Arubus reconsidera e nombramento aki.
Prome Minister ta splica cu Arubus ta un compania estatal y ta tuma desicionnan riba su mes a base di e reglanan di “Corporate Governance”. Gobierno no por interveni of revoca e decision pero si por duna opinion y por comparti preocupacionnan riba e nombramento.
“Nos Gobierno desde cu mi a bira minister encarga cu integridad na aña 2017, a haci integridad un punto di atencion y tambe mi a pone hopi prioridad na dj’e. No por ta asina cu nos Gobierno tin un maneho di integridad y un compania estatal ta haci lo contrario. Manera mi a menciona anteriormente, Gobierno no por tuma e decision of cambia e decision di Arubus pero si nos por pidi pa reconsidera e nombramento, y esey ta loke nos a haci”, Prome Minister a declara.
