Fundacion Lanta Papiamento:
* Tin metodo y curiculo traha, pero nan mester wordo rebiba
ORANJESTAD (AAN): Mientje Croes di Fundacion Lanta Papiamento (FLP) a duna di conoce cu tin un comision cu Minister di Enseñansa a encarga na Departamento di Enseñansa pa loke ta e implementacion di idioma Papiamento den e scolnan na Aruba.
Relaciona cu esaki, tabata tin intercambio cu diferente gremio den comunidad. Pa loke ta pueblo, a invita na e dialogo nacional den tres diferente bario, a bisa.
"Conscientisacion ta loke nos di Fundacion Lanta Papiamento por a duna hopi mas di esey", a expresa.
Segun Croes, si por wak e dialogonan cu a tuma lugar den bario unda supuestamente mayornan, pueblo lo a atende, esey no tabata exitoso pasobra na Playa no tabata tin hopi hende, na San Nicolas tabata tin tres pa cuater hende y na Santa Cruz tampoco tabata tin hopi hende.
Loke FLP ta desea ta pa pueblo ta consciente cu e sistema cu tin aworaki no ta loke mester ta pa e muchanan. Pa e futuro generacion di Aruba, a remarca.
El a agrega cu e cambio cu ta pidiendo aworaki ta cu ta skirbiendo un Nota. E ultimo reunion cu a tuma lugar a haya 'feedback' di diferente grupo y aworaki e conseho definitivo mester bay pa minister .
Loke e gremionan a trece dilanti ta cu ta boga pa un sistema na Ingles-Papiamento of Hulandes- Papiamento. FLP ta wak esaki hopi pober pasobra nan lo kier a wak mas idioma. Nan ta mar'e na finansas, pero e ta kere cu unabes cu Aruba por prueba cu multilingualismo den cuadro di e SDG's, henter mundo ta bogando pa multilingualismo pasobra esey ta bira e yabi pa tur mucha den futuro por yega tur parti di mundo y por ta exitoso, Mientje Croes a expresa. Y claro, nos pais ta multilingual, kiermen cu esey lo ta e yabi, a agrega.
Croes a bisa cu loke ta haci Aruba diferente aworaki ta cu no tin e capacidad, kiermen, cu maestronan no a keda re-capacita den mas cu 20 aña y esey ta un reto riba su mes. Pasobra no por pone un maestro di cualkier scol dilant'i klas y e mester domina 4 idioma.
A enfatisa cu pa esaki mester cambia e curiculo, inverti den IPA. Departamento di Enseñansa tin un departamento di guia y eynan ta traha tiki hende. Kiermen cu esaki ta nifica placa. A agrega cu tin metodo y curiculo traha, pero esey nan tur mester wordo rebiba.
El a bisa cu e profesionalnan ta para pa e cambio aki. Pero con cu bay bin e conscientisacion no a cristalisa. Datanan cu ta existi 30 aña caba no a cambia y a bira bieu di mas y Aruba a bay hopi tras den e parti di educacion.
Fundacion Lanta Papiamento ta wak cu nan mester bira mas activo riba e parti aki y cuminsa purba pa scolnan haya guia y ta mas habri pa esaki pa canalisa kico ta bira e papel di curiculo di Departamento di Enseñansa den tur esaki y di Minister.
Unabes cu e conseho ey yega gobierno, gobierno por para firme na Hulanda y ta bay haya fondonan pa proyectonan. E ora eynan por envolve FLP. Mientrastanto, mester gana tempo pa conscientisa pueblo y veld, a declara.
