ORANJESTAD (AAN): Parlamentario drs. Shailiny Tromp-Lee a indica cu desde maart 2020 pa awe, cu duele na su curason, e mester bisa
cu ya 6 di nos piscadonan ta perdi riba lama. Ta trata di Pau Martijn, Peter Kelkboom, Yubi Loefstok, Liang De, Junshi Feng y Xio He. "Esaki sigur ta perdidanan doloroso di nos hendenan y un dolor grandi pa nan famia y amigonan. Na mes momento cu cada perdida di nos hendenan riba lama gobierno ta start up e buskeda necesario cu ta trece un gasto grandi cu ne. Esaki ta un punto di atencion di mi como parlamentario y sigur di e gobierno saliente."
Tabatin bou auspicio di minister Andin Bikker investigacion realisa pa metodonan mas eficiente pa introduci y incentiva piscado y baydo di lama en general pa garantisa nan seguridad. Durante e siguiente gobernacion sigur esaki mester ta un enfoke di prioridad pa pone e solucion den practica. Mirando e cantidad di hende cu ta perde riba lama esaki ta esencial.
Den e programa di Gobernacion 2021-2025 di MEP sigur e sector primario den su totalidad ta haya mas atencion. Entre otro e mercado popular lo sirbi pa ofrece productornan local y tin varios punto pa stimula hasta exportacion. E creacion di un plataforma nacional lo ofrece tur productor, y piscado tambe ta den esaki, un mihor canalisacion pa trece nan puntonan dilanti. Pa medio di innovacionnan, y den esaki e parti di seguridad riba lama sigur ta bin na remarca, lo modernisa varios aspecto di e sector primario.
En corto lo traha hunto cu institutonan na un manera mas activo, cu conocemento di nos hendenan local, pa facilita informacion y conscientisacion. Similar na e charlanan informativo cual fundacionnan y kustwacht tabata duna den pasado na entre otro centro di pesca Hadicurari tempo mi tata Ramon Lee tabata minister. Mester pone prioridad un biaha mas na e parti di educacion y concientisacion di e.o nos piscadonan.
Ademas door di sincronisa informacion y procesonan necesario, por spera cu denter di poco tempo tur piscado lo sa ki tipo di aparato (manera un alarma) nan mester tin abordo, pa asina cu nan tin problema kustwacht y otro instancianan ta haya sa. Esaki sigur por yuda minimisa perdida di nos hendenan riba lama.
Sector primario sigur ta haya su atencion special den plan di Gobernacion di partido MEP.
