ORANJESTAD (AAN) – Den conferencia di Prensa di Departamento di Impuesto Aruba (DIMP), su director señora Luanne Pieterz a bisa
cu tambe ta importante pa menciona cu DIMP a introduci un sistema, pa pidi e comprobante di pago online.
Ya caba tin hopi cliente cu a haci uso di esaki, y DIMP tambe a siña cu den e proceso cu nan ta digitalizando poco, poco cu tin un par di aspecto cu por y lo bay mehora tambe den futuro.
Pietersz ta haya cu ta interesante cu ya varios cliente a haci pedido pa comprobante di pago digital. Di hecho, tin 19.570 comprobante di pago digital a wordo pidi na DIMP, entre Januari cu Mei aki”, y a wordo procesa 15.057 peticion te cu awo.
Luanne Pietersz a agrega cu DIMP tin tres funcionario publico cu ta procesa e comprobantenan di pago digital y cada un a procesa un average di 5.000 cada un. Falta un suma di 4.500 comprobante di pago pa procesa ainda cu e ta kere cu pa fin di Mei lo keda cla.
No obstante, director di DIMP a comenta cu tin clientenan cu ta bisa cu for di Januari nan a haci e peticion y ainda no a haya e comprobante, y el a señala cu enberdad nan a ripara cu tin hechonan cu ta pone un desafio pa por saca e comprobante di pago mucho mas lihe cu e cliente ta verwacht.
Tin ora nan ta wak cu e pagonan ta sosode via transfer, bill-payment, pagonan sin personal number, pagonan sin nummerplaat, pagonan cu no ta completo, of e cliente ta paga 2021 pero e tin sumanan habri ainda di 2020, riba impuesto di auto.
“Pues, esaki ta duna nos e desafio cu nos no por saca e comprobante di pago den un solo biaha, mirando cu nos tin cu pone e pago cu e cliente ta haci na 2021 den e suma cu tin habri, cu ta trata di otro aña den pasado”, director di Departamento di Impuesto a señala.
