Señora Maria v.d. Biezen violencia online:
ORANJESTAD (AAN): Relaciona cu e 16 Dianan di Activismo proclama pa Nacionnan Uni pa conscientisa y stop violencia contra hende muhe y mucha muhe, por ripara cu diferente organisacionnan, fundacionnan entre otro, ta organisa eventonan pa trata e topico aki.
Centro di Desaroyo di Hende Muher (Cedehm) diahuebs mainta tawata tin un simposio pa profesionalnan riba e tema "Lucha contra Crimen y Violencia Digital, Stalking y Siguridad online di hende Muher"! Ban Empoder’e y Proteh’e!! Un di e panalistanan tawata señora Maria Vd Biezen, un hurista cu a traha cu Cedehm cu diferente caso di violencia domestico.
Durante e evento, Matutino DIARIO a tuma e oportunidad pa entrevista señora Vd Biezen na unda cu el a expresa cu semper violencia tawata existi pero cu e plataformanan di tecnologia avansa, awe violencia domestico ta mas visibel, especialmente contra mucha, hoben y hende muhe. Exaki ta un alerta cu mester sigui conscientisa y keda prepara, pa loke señora v.d. Biezen a elogia e veld social pa e bon trabou cu nan ta haci pa nos comunidad.
El a remarca cu hende muhenan cu ta pasa den cualkier tipo di violenia, hopi biaha ta opta pa keda den silencio pa motibo cu sea e caminda legal por ta largo y dificil, nan no sa con pa haci pa entrega keho, of ta sinti berguensa. “Aki ta unda nos mester empodera nos hendenan muhe”, segun señora v.d. Biezen.
E acceso pa haya cos bon na internet ta hopi grandi, pero tambe pa haya hopi cos malo. Segun señora Vd Biezen, ta dificil pa controla kico ta wak y kico no. Den caso di hoben y muchanan cu ta haci uzo frecuentemente di internet, mayornan ta esnan responsabel pa vigila y controla e actividadnan di nan yiunan online.
“Como hurista, nos enfoke ta pa bin cu iniciativa y proyectonan pa mehora e posicion huridico pa proteha e grupo mas vulnerabel den nos comunidad, nos muchanan, nos hobennan, y nos grandinan. Aunke cu nos codigo penal ta hopi bon, tin luga pa mehoracion y inclui mas proteccion pa e problema di violencia online”, señora v.d. Biezen a expresa.
