Mercadonan global di accion ta cerca di un ‘top’ strategico

Analista Simon Waslander:

ORANJESTAD (AAN): Accion riba mercado publico miho conoci como “stocks” ta un topico hopi cayente na e momento aki. Cu mercadonan global di stock markets riba trayectoria exponencial y principalmente esun di companianan di tecnologia. Ta hopi facil pa cay den un trampa grandi di cuminsa specula den e fanfaria mundial cu tin awo.

   Segun e analista local Simon Waslander, e mes ta consehando participantenan den mercado pa ta sumamente cauteloso e tempo benidero.  E ta pidi nan pa ta cauteloso pa diferente motibo, cu e lo bay splica tambe.

   “Mi persona ta pensa cu mercadonan global di stocks ta cerca di un ‘Top’ na nivel strategico.  Pues simplemente cu den terminonan real (ahusta pa inflacion) nan no lo hisa hopi mas den futuro benidero.

   Indicadornan awor: E indicadornan di sentimento mustrando “euforia excesivo”.  Varios indicador cu ta midi sentimento den mercadonan di accion ta mustrando cu nos ta den teritorio di speculation excesivo. Den otro palabra tur hende ta positivo, tur hende ta cumprando y tur hende ta pensa cu mercado lo sigui hisa. Esaki debe na tools publico mane e “Fear & Greed Index” di media outlet CNN. Pero tambe modelonan super sofistica y priva manera di Bank of America y Merril Lynch.
   Tambe speculadornan profesional grandi tin posicionnan na nivel record den stock markets na e momento aki. Esaki tambe ta un indicacion cu tur hende cu kier cumpra a cumpra caba. Un otro motibo pa pensa cu na nivel strategico nos ta mas cerca di un “top” grandi.

   Mercadonan di accion ta hopi caro: Un di e factornan mas grandi riba un nivel strategico pa ora un hende cumpra kico cu ta pa investment ta pa sa con caro eta relativamente na cuanto e ta rindi. Awo tin masha hopi manera mes con pa midi esaki, tin mas complica cu otro. Pero esun di mas simpel y mas clasico di tur y cu a mustra cu e por pronostica performance den futuro hopi bon ta e “Price-to-Earnings” ratio.

   Riba un escena mundial y vooral na Estados Unidos  e “PE” ratio segun e analisis di Goldman Sachs ta na un nivel sumamente halto mes. Pues un speculador lo ta cumprando na un nivel “hopi caro”.

   Factornan Structural: Fo’i topiconan di eleccionnan te cu e crisis na China, no mester lubida tambe cu riba nivel strategico tin varios problema sumamente grave y dificil pa resolve. “Esaki mi a detaya den mi analysis exclusivo pa DIARIO publica dia 7 di Februari 2024 titula: “Analisando e problemanan mundial severo bao superficie”.

   Un factor cu tiki hende ta tuma na cuenta ta cu e aña aki lo ta letterlijk e aña unda 40% di e mundo su poblacion ta bay vota, cual ta representa mas cu 60% di GDP global. Cu inflacion halto, poblacion disgusta en general, e aña aki por cuminsa mustra e prome indicacion di politica di “mas extremo”. Esaki como trend grandi structural por ta algo hopi dificil pa bisa precisamente kico e lo nifica. Bisando esaki mi ta conseha tur hende tuma nota di pintura politico globalmente.

   Conseho legal: Simon Waslander a splica, cu e articulo aki ta uno di caracter informativo. Na ningun momento e autor ta indica na ningun manera pa cumpra of bende productonan financiero. E autor no ta para responsabel den ningun manera si un persona dicidi di specula den cua modo cu ta. E articulo ta uno den contexto educativo y no por worde mira of uza den speculacion.