Mercado di Santa Rosa ta Diadomingo awo 2 di Juni

Randi Maduro, PR Santa Rosa:

ORANJESTAD (AAN): Relacionista Publico di Departamento di Agricultura, Cria y Pesca “Santa Rosa”, señor Randy Maduro, den entrevista cu DIARIO a señala cu tanten cu tin awa den e damnan rond di Aruba, cu Santa Rosa por provee, sigur e ta keda haya produccion, y tambe segun e acuerdonan cu LVV tin e companianan estatal manera WEB Aruba NV.

WEB Aruba NV a yuda Santa Rosa cu e tarifa di awa di manera cu nan por yuda mas di esnan cu ta interesa den e sector primario di Aruba, pero sigur Santa Rosa ta hayando productonan door di e agricultornan local locual ta haci cu for di Januari nan a realiza algun pop up market.

Riba Diasabra 14 of 15 productor local ta bin bao di un solo tent pa ofrece nan productonan na Santa Rosa su clientela, y e siguiente ta un mercado mas grandi, cu ta e mercado grandi custumbra na Santa Rosa. E ta bay ta den e area di matanan frutal caminda ta mas berde y fresco cu tur hende ta gusta.

Esaki lo ta riba Diadomingo awo 2 di Juni, cuminzando pa 9 or di mainta te 2 or di atardi unda ta bay tin mas cu 30 productor local, y claro: e cuminda crioyo, e sopi, e platonan di pisca, bonchi, concomber stoba, papaya stoba, tur esakinan e publico lo haya den e Mercado di Santa Rosa.

Randy Maduro ta aconseha tur hende pa yega trempan, prome cu e fluho di hende bira mas grandi. E ta gradici tur esnan cu a reaccion riba e mercado Santa Rosa, tur e productornan cu ta sosteniendo e mercado; sin nan e mercado lo no ta exitoso. “Yega pasobra ta bay tin carni fresco, fruta y berdura fresco, cuminda crioyo, licor, cosnan traha na Aruba, jam, jusnan fresco, batido, etc. Kiermen, den Mercado di Santa Rosa bo mester ta Diadomingo awo, yega trempan pa bo por bebe awa limpi”, Randi Maduro a reitera.