ORANJESTAD (AAN): Ya caba autoridad sa ta for di cua bahia of pier, mayoria di e speedboat tipo Go-Fast ta sali,
patapata di droga rumbo pa Centro America, Republica Dominicana, of Islanan ABC cu e meta pa e droga aki yega sea Merca of Europa pa consumidornan cumpra nan.
Pero US Customs and Border Protection tin constantemente personal di Air y Marine Operations bulando cu avionnan P-3 Long Range Tracker y tambe Airborne Early Warning cu no ta djis vigila botonan militar di otro paisnan, pero awor tambe botonan cu droga abordo.
Durante luna di Juli y Augustus, nan a logra intercepta 8.000 kilo di cocaina, strobando organizacionnan criminal di gana riba di $333 miyon cu esaki.
Dia 11 di Juli, personal di P-3 Airborne Early Warning and Long Range Tracker a localiza y vigila un Go-Fast sospechoso den parti pariba di Oceano Pacifico, y despues a laga un personal di avion P-8 di US Navy sigui vigile, y finalmente US Coast Guard a usa un helicopter y speedboat special pa intercepta nan. Abordo tabatin 790 kilo di cocaina.
Dia 12 di Juli, personal di P-3 Airborne Early Warning a detecta un Go-Fast den Lama Caribe. Team di varios otro pais a cuminza vigila esaki, y a intercepta e speedboat. Abordo a haya 5.650 kilo di cocaina y a detene tres persona.
Dia 6 di Augustus, personal di P-3 Long Range Tracker a localiza un Boto di Piscado sospechoso den Oceano Pacifico. E avion di basta leu a keda vigila e boto y a manda US Coast Guard bay check esaki, y nan a bay abordo. Aki nan a confisca 1.550 kilo di cocaina y a detene cuatro persona.
National Air Security Operations Center cu nan capacidad di avion P-3 ta sigui duna sosten esencial pa yuda combati abusonan den zona di transito di narcotica. Nan tin dos centro di operacion pa avionnan P-3 cu ta situa na Jacksonville (Florida), y Corpus Christi (Texas). E avionnan aki ta bula den tur area den Norte America y Centro America, defendiendo nan frontera y pa stop intentonan di contrabando di persona y tambe di droga.
