Specialistanan Medico ta preocupa - ORANJESTAD (AAN): Relaciona cu e trabao di formador di Gobierno, semper ta conoci den pasado cu nan ta reuni cu gremio Sindical, gremio Comercial, etc.
E biaha aki, ta e gremio di Sector Medico a haya tur atencion di formador Evelyn Wever-Croes. Riba Diabierna esey tabata e caso, y un di esnan cu a reuni cune, ta e gremio di Docternan Specialista di Asociacion ASHA.
Asociacion ASHA (Asociacion Specialistanan di Hospital), na final di e reunion a papia cu prensa.
Señora Van den Oever a splica cu nan a probecha di e reunion aki, pa asina notifica Informador di tur e ideanan cu ta biba cerca e Specialistanan Medico na Aruba. Tambe a splica Informador, riba loke nan ta kere cu Gobierno por haci mihor, y kico ta nan preocupacion en general. Tambe a duna detaye di loke e Specialistanan Medico ta convenci ta importante pa e siguiente Gobierno tene cuenta cune.
E tabata un combersacion bon, y e Specialistanan a logra di duna suficiente informacion, y a nota cu Formador tambe a haci hopi pregunta.
Cu Formador haciendo hopi pregunta, a pone cu e Specialistanan Medico a cuminza sinti cu nan a siña conoce otro mihor, den sentido cu nan sa awor unda e problemanan ta sinta. Di otro banda, nan a nota cu hopi asunto ya caba tabata na conocemento di Gobierno.
Loke nan a enfoca riba dje, ta cu ta importante pa cuminza mira riba calidad den cuido medico y esey nan kier keda mantene y salvaguardia. Aki a elabora riba diferente problema, y esaki nan a discuti cu e speranza cu lo bay bin mehoramento pa asina por keda garantiza e Cuido Basico Plus riba e isla.
Tur esaki teniendo na cuenta na e problemanan financiero di AZV, di Hospital, y tambe di Gobierno, y e problemanan cu nan a confronta cu e edificio nobo.
Tambe dentro di Hospital tin un problema grandi pa por atrae bon personal y keda mantene nan den servicio, y aki nan tabatin varios idea y a splica Formador di esey pa mehora esey.
Encuanto e situacion financiero di Hospital, tambe Asociacion ASHA ta mustra su preocupacion. Tur hende a haci nan best durante e crisis di Coronavirus pa por a sigui presta servicio, y e sistema cu a economiza tabata bon pasobra tabata aceptable e tempo ey pasobra ta henter e isla ta pasando aden. Pero pa awor nan sigui economiza, ta algo cu nan no ta kere cu lo yuda pa mehora situacion pa resto di e aña aki of na 2022.
Specialistanan Medico ta hopi preocupa, pasobra e medidanan di austeridad aki lo por pone Hospital sigui perde bon personal, y pa colmo lo no por atrae esnan experto mas pa reemplaza nan.
Cu esaki, nan kiermeen cu un nurse cu bin traha na Aruba, lo haya menos salario (e.o. beneficionan secundario) si acaso el a bay traha na un otro isla. Na Hulanda mes, bo ta haya mucho mas den salario. Esey pues ta un obstaculo. E otro obstaculo ta cu si un Nurse muda di exterior pa bin traha na Hospital, awor DIMAS no ta duna permiso mas pa e partner pa e tambe haya trabao na Aruba, y esey ta hacie hopi fastioso den forma financiero.
Hospital a corta demasiado na vet caba, pues a economiza asina hopi, te cu awor unico cos cu bo por spaar placa riba dje ta pa duna pashentnan tratamento na e lugar corecto, y no djis verwijs nan pasobra e pashent ta desea esey, of pasobra esey lo bay ta mas facil.
E Specialistanan Medico tabatin varios idea tambe cu ta importante pa keda reforza Docternan di Cas, pasobra un first-liner fuerte por yudabo limita costonan di salud, y na final bo ta sali mihor cune.
Segun señora van den Oever, tin di cuminza pensa aki hopi tambe riba cuido preventivo. Aki por pensa pa duna bon alimentacion y guia fisico na hobennan pa asina por bira conciente y cuminza biba mas saludable. Pasobra asina kizas por yuda pueblo cu ta bayendo den direccion robez cu diabetes y presion halto di sanger. Pasobra si e sigui asina, den futuro e lo bay ta algo cu ta impagable.
Nan suplica pa Gobierno nobo ta pa concentra riba esey. DIARIO a nota cu ta hopi biaha hendenan a papia riba cuido preventivo, pero cu e.o. AZV no ta den e direccion ey. Den pasado un experto na Merca a yega di splica, e.o. cu si AZV cuminza na Aruba cu cuido preventivo (e.o. cu medicina pa yuda hende baha peso), e lo por evita cu den futuro e pashentnan ey lo bira pashent di diabetis of presion halto.
Pesey mes, ta un gran logro cu e Specialistanan Medico a logra di informa Formador mes di e idea ey.
