Mas cu 20 cacho y un señora di edad bibando den estado deplorabel

Caso lamentable di negligencia di bestia na Simon Platstraat -  ORANJESTAD (AAN):  Diaranson mainta a drenta na Bureau City Inspector un melding relaciona cu maltrato di bestia.

Ta asina cu na un adres na Simon Platstraat 29 na Cura Cabai a bin topa cu basta cacho den mal estado. E instancianan concerni cu ta City Inspector, Cuerpo Policial, Departamento di Salud (DVG), Ambulans como tambe algun representante di Centro di Cacho a presenta na e sitio pa atende cu e caso.

Na e cas aki ademas di basta cacho a haya un señora di edad halto cu no tabata mustra bon di salud.

Esaki ta trata di un caso di negligencia di bestia unda a topa cu cachonan mal cuida, hopi flaco y mal nutri. Algun di nan tambe basta malo.

E situacion den e cas tabata antihigienico y mas cu claro mester a wordo atendi.

Na e sitio tambe a presenta un representante di un fundacion cu ta atende cu cacho di cacho of cu casonan special.

E señora mes den e cas a laga sa cu e cachonan e no tabata kier mas.

Unidad di Control di Cacho a logra piki algun cacho cu tabata den un estado basta penoso. Mientras cu otro cachonan, e representante di e fundacion a pidi pa atende cu nan mes na e sitio.

E caso di e cas aki tabata den noticia via medionan social dialuna caba ora cu a indica cu un di e cachonan a purba di huy for di e cas pero el a keda pega den trali di e cura di e cas. Ora cu a wak e situacion y cu ningun hende a sali pafo, Bureau City Inspector a cuminsa actua riba e caso aki ya cu e caso tabata mustra uno serio.

Riba dialuna mes, representantenan di algun fundacion a bay cu algun cacho cu tabata malo pero otronan a keda atras. A duna nan te diaranson pa bay cu e cachonan, pero diaranson ainda e cachonan tabata tey.

Pesey BCI a presenta pa atende cu e caso, pero a haya nan mes cu e situacion di e señora cu tin 75 aña cu no ta den bon estado di salud tampoco y ta biba su so den e cas. E cas mes ta den un condicion deplorabel y a base di esey a pidi intervencion di DVG y e demas instancianan pa wak kico por a haci pa e señora aki.

Na e adres tambe Gele Koorts Muskieten Bestrijding (GKMB) a haya criadero di sangura den e cura.

Finalmente, a bay cu algun cacho ya cu e fundacionnan a laga sa cu no tin lugar pa tur. Toch, BCI a bay cu e resto pasobra no por a laga nan eynan ta sufri den e situacion cu nan tabata.

Ta trata akinan di un promedio di 21 cacho, puppies y adulto cu a wordo rescata for di e situacion lamentable cu nan tabata bibando aden.

Entre algun di e fundacionnan lo percura pa yega na e fondonan necesario pa sterilisa nan, vacuna nan y atende cu nan estado di salud.

DIARIO a compila algun potret tambe di Luna Foundation Aruba Facebook Page.