Mas Centro di Cuido awor sa con pa actua den emergencia

Danki na curso di Fundacion Pa Nos Muchanan

ORANJESTAD (AAN): Hecho ta cu awendia, ta importante pa tur Centro di Cuido rond mundo ta ricibi training kico cada trahador tin di haci den caso di emergencia, y tambe den caso cu nan tin di duna prome auxilio na cualkier mucha.

   Pesey mes, recientemente Fundacion Pa Nos Muchanan (FPNM ) a organiza un trayecto di 4 dia di “Siguridad den bo Centro di Cuido”.

   Motibonan principal ta cu asina, cada Centro di Cuido por ofrece tur hende siguridad y cumpli cu rekesitonan.  Rond mundo tin paisnan unda nan ta rekeri pa cada Centro di Cuido tin por lo menos un trahador cu suficiente certificado pediatrico pa Prome Auxilio, y pa e ta presente constant na e centro.

   Tambe ta asina cu personal di e Centro di Cuido mester sa y domina actuacion den cualkier incidente comun, manera muchanan cu haya dificultad pa hala rosea, quemadura, fractura, y esnan cu ta bay fo’i tino.  Training ta yuda e trahadornan mantene nan mes calmo y actua eficiente durante situacionnan di extra stress aki.

   Claro si nan ta siña con pa combati cualkier candela den cushina, ta un bonus agrega!  Pesey Fundacion Pa Nos Muchanan kier a gradici Be Safe 4 Life Consultancy pa e tremendo trabao cu a yuda den e cursonan aki.  Na final tur esnan cu a finaliza e curso cu exito, a ricibi un certificado.

   Fundacion ta pidi pa tur Centronan keda pendiente pa e siguiente cursonan.  Pasobra tur hunto ta labora mihor pa siguridad di muchanan.