Marina Colombiano y Guardacosta ta sigui busca e otro 5 persona desapareci

Sinkmento di barco Arcangel Miguel

ORANJESTAD (AAN): Varios reaccion a drenta di personanan cu no tabata sa mes cu e conocido barco Arcangel Miguel a sink Diasabra anochi riba lama grandi entre Aruba y Colombia.  Loke mas tin hende spanta, ta cu di e 7 personanan abordo, solamente uno a logra scapa.  Dialuna a bira conoci cu un persona mas a wordo haya sin bida.

   Esey nifica cu keto bay tin 5 persona perdi y trabao di Search & Rescue ta sigui keto bay na e costa mas extremo di ‘Alta Guajira’ na Colombia, bay te cu area di Riohacha.

   Marina Colombiano a hasta emiti un alerta pa piscadornan di area di Uribia, Manaure, y Riohacha, como tambe Dibulla pa nan ta alerta ora nan ta riba lama, si acaso nan lo por mira un señal di naufragonan di e barco Arcangel Miguel.

   E unico cu a sobrevivi: Tabata Diasabra anochi cu biento fuerte cu lama bruto, a sorpende esnan riba e boto aki.  E momento ey casi tur persona tabata drumi, y un di esnan cu tabata lanta ta Juan Carlos Sanchez.  E ta un persona multifacetico riba e barco aki.

   Juan Carlos Sanchez no tabata djis e koki cu ta prepara cuminda pa nan tur, e ta ademas un bootsman, y ta vigila tambe tur cos den sala di motor di Arcangel Miguel, cu ta un boto color blauw cu ta 18 meter largo y seis meter hancho.

   E persona aki ta procedente di Punto Fijo, y como cu e tabata cerca di un salida di e boto, el a logra bula afo na momento cu un ola masha grandi mes a dal contra nan di banda, y esey a pone e barco kapseis.  Despues e barco a sink hopi acelera mes, y Juan Carlos Sanchez a mira ningun di su otro coleganan sali afo.  Nan lo a sink bay abao na forma sorprendi hunto cu e barco den e scuridad ey.  Luznan a paga den e barco, hunto cu awa yenando tur skina, lo por a dificulta e tripulantenan pa logra haya un salida adecuado pa salba nan mes.

   Marina Colombiano a indica cu e kapseis y hundimento a socede ora cu nan tabata na costa di Puerto Estrella na Alta Guajira, na parti zuidoost di Maasimay, y noordoost di Surrutpana, Colombia.

   E barco tabata riba e ruta di Aruba pa Santa Marta pa transporta carga.

   Esnan cu falta pa haya: Dialuna a wordo saca di lama e curpa sin bida di Lino Alberto Gómez Galicia di 50 aña, procedente di La Vela, municipio Colina kende tabata 1st Officer.

   Pues ainda falta 5 persona di e barco pa wordo haya.

• Ledy Rafael Mata di 70 aña di edad, kende ta e capitan y e homber cu mas experiencia riba e barco. E ta procedente di Puerto Ayacucho na estado Sucre.
• José Miguel Viscaino Frontado ta procedente di Lagunillas na estado Zulia.
• José Alberto Sánchez Sánchez di 52 aña, procedente di Amuay, municipio Los Taques. (E ta omo di e sobreviviente).
• Andry José Narváez Sánchez di 43 aña, procedente di Amuay, municipio Los Taques.
• José Antonio Salazar Marval procedente di municipio Tubores di Isla de Margarita.

   E barco mes Arcangel Miguel ta original di Las Piedras na peninsula di Paraguana.  Sinembargo ora cu e frontera cu Venezuela a cera, e capitan a dicidi na bay establece nan mes y e barco na Colombia, pa por a sigui cubri e ruta di carga di Colombia pa Aruba, y no wordo afecta pa e cierre di frontera.

   Aunke e distancia di Aruba pa Colombia ta mas largo compara cu Aruba pa Punto Fijo, e necesidad pa trabao a pone nan asumi e riesgo aki cu e barco.

   E tripulantenan di Arcangel Miguel atravez di añanan a cera hopi amistad cu Arubianonan, y bo ta mira cu semper nan tabata bon hende cu dedicacion pa nan trabao riba lama.  Es mas, e mesun barco Arcangel Miguel aki den pasado a yega di duna un man na rescate di naufrago tambe cu a haya nan den problema riba lama.

   Autoridadnan Colombiano a bisa cu e area unda e barco a sink, tin un fondo masha hundo mes.  Pues e chens ta cu e curpanan cu a keda pega den e barco lo no sali facilmente di eybao.  Es mas, un operacion di rescate na un profundidad asina ta hopi costoso.   Pero nan ta keda patruya tur e area ey pa awor.