Maria Jansen tin 80 aña y ta keiro tur caminda riba motorcycle

SPEEDWORLD

Un saludo cordial na tur fanatico di deporte di motor, ata aki Speedworld cu boso sirbidor Hubert Furai Tiel.

   Awe ta dedica e pagina aki completamente na e celebracion di 80 cumpleaño di señora Maria Jansen kende a festeha su cumpleaño rondona pa su amigonan di Motorcycle cu tanto e ta stima asina.

   Maria a cumpli su di 80 primavera, pero e curazon mes ta pensa cu ta 45 aña di edad e tin.  Nan a festeha su fecha glorioso cu un “Bike Ride”.

   “Ami mes tin 25 aña coriendo,” Maria a declara den un entrevista cu Speedworld.  E tabata core antes cu su yiu homber chikito Julio.  Ora e ta bay scol, e ta bay cu brommer y ta pasa busca Maria, y di e forma ey el a custumbra di core sinta patras riba e motorcycle.

   “Mi ta sintimi dushi y hopi contento ora mi ta sinta patras riba brommer,” e cumpleañera a sigui bisa.  El a mustra cu awor e ta coriendo cu Buchi y ta sinti su mes safe cune.

   El a admiti cu e muchanan ta blo puntre pakico e ta sigui core riba brommer.  “Mi ta contesta nan, cu mi a custumbra caba, y mi gusta dal mi paseonan rond riba motorcycle.  “Mi gusta core den rides, y ta encanta ora mi core full rond di Aruba.”   El a bisa cu e ta contesta e muchanan: “Mi tin di diverti mi mes!”

   Señora Maria Jansen a bolbe ripiti cu el a custumbra completamente coriendo riba brommer cu su helm riba cabez..

   El a indica acerca, cu el a viaha den exterior tambe pa participa den Rides na e.o. isla di Bonaire, Curaçao, y Suriname.  “Semper sinta patras y pasando dushi,” el a bisa

   Maria a bisa cu nunca e no wanta e stuur y purba na core brommer riba su mes, pasobra e ta haya cu e motorcycle ta demasiado pisa pa e wanta y pa e controla.

   El a finaliza bisando: “Pero patras si mi ta sinta cu placer.”  Aki por mire cu e grupo di Camacuri durante un paro pa refresca garganta na Weng Kee Restaurant na Piedra Plat.

   Speedworld ta desea Maria Jansen, hopi mas aña di bida, cu yen di bendicion y proteccion.