Maria Delgado Piñeros ta empleado di juli na HOH

ORANJESTAD (AAN): Dr. Horacio E. Oduber Hospital a anuncia cu Maria Delgado Piñeros, wondconsulent di departamento di Wondenpoli a wordo elegi como como empleado di luna.

E departamento a nomina nan colega Maria cu ta traha cu nan desde 2014. Señora Arely Els, Wondconsulent & Verpleegkundige coordinator, a duna di conoce cu Maria ta hopi colegial, por depende hopi riba dje, ta traha cu hopi smaak y e pashentnan ta confia hopi den su trabou.

Pa henter un siman largo e coleganan di Maria a prepara e sorpresa aki. Maria ta un persona cu no gusta sorpresa pues e no tabata facil pa organisa algo sin cu e ripara algo. Maria a keda spanta di e sorpresa aki pero a haya esaki toch hopi leuk y ta aprecia loke su coleganan a haci. E ta conta cu e tin shete aña ta trahando na wondenpoli y e ta haya cu e ta un trabou hopi bunita. Hopi hende no ta sa di e tipo di trabou pasobra wondenpoli ta scondi mirando cu e ta chikito pero toch hopi esencial. Loke e gusta di su trabou ta con ta acerca y papia cu pashent y e guia con pa cuida nan salud y e guia pa cuido di herida.

Maria ta semper un bon teamplayer cu ta flexibel, ta duna feedback na un manera respetuoso y ta bin cu iniciativanan con pa mehora e departamento. E tin hopi dedicacion pa su trabou unda cu e pashent ta su prioridad y por mira esaki na e tempo cu e ta dedica na e pashent y e famia. Maria ta un persona cu tin empatia y ta duna conseho na e famia tambe. E pashentnan ta gusta con Maria ta trata y comunica cu nan. Nan ta reacciona positivo y contento ora di mir’e. Ademas, e tin un bon cooperacion y comunicacion cu e specialistanan.

E ta un persona cu gusta siña y mehora su mes. Maria mes ta busca e literatura necesario pa siña cos nobo. Tambe e ta yuda guia studiantenan cu ta bin na e departamento. E ta habri pa cambio y ta educa su mes pa asina sigui duna servicio di calidad.

Romeo Kilayko, wondconsulent, a duna di conoce cu el a sigui henter trayecto di Maria su carera na hospital desde cu e ta studiante. Romeo tabata un di esunnan cu a guia e grupo cu Maria tabata forma parti di dje y e sa con el a cuminsa. E ta haya cu Maria tabata e persona corecto cu nan por a forma pa bira un wondconsulent. Maria a logra y ta un di e persona nan mas fuerte cu tin den e team. Tambe e ta un persona servicial p’e pashentnan, ta traha duro y tin pasion pa su trabou. Actualmente Maria ta bayendo un otro rumbo den su carera den Hospital y su coleganan ta dese’e exito den su proximo reto. Un colega ehemplar cu sigur a demostra di merece e titulo bunita aki! Masha pabien Maria!