Maneho financiero responsabel a crea confiansa y haya elogio di institutonan financiero local y internacional

Lider di MEP, Evelyn Wever-Croes:

ORANJESTAD  (AAN): Den curason di Dakota, diadomingo 7 di juli, a tuma luga un otro encuentro exitoso y interactivo di ‘BAN TOPA’. Partido MEP durante e dos ultimo añanan ta pasando tur bario di Aruba pa asina brinda informacion corecto di loke Gobierno ta bin ta haciendo y logrando pa progreso di nos pais.

            Lider di Partido MEP Evelyn Wever-Croes a habri e encuentro di ‘BAN TOPA’ enfatisando un biaha mas e importancia pa informa pueblo y reflexiona kico tur Gobierno ta haciendo pa asina mustra, cu palabra y cu hechonan, cu Aruba mester di un Gobierno cu Movimiento Electoral di Pueblo MEP pa salvaguardia e futuro di nos yiunan.

            Den lineanan grandi Lider di MEP a splica con ta bayendo cu Aruba. Y ta importante pa cada ciudadano di nos pais ta na haltura di e progreso di nos pais pa asina por tuma desicionnan cu lo dicidi e futuro di nos pais. Partido MEP, drentando campaña pa eleccion 2025, un biaha mas ta pidi pueblo di Aruba completo pa un biaha mas deposita su confiansa den Partido Movimiento Electoral di Pueblo. “Esaki no ta un peticion facil ni automatico pasobra esaki ta pa di tres biaha cu nos ta pidi pueblo di Aruba pa duna nos e confiansa pa goberna nos pais, y ta p’esey ta importante pa reflexiona bek riba tur loke Gobierno ta haciendo pa prosperidad di nos pueblo y mustra cu Aruba mester di un Gobierno cu MEP aden”, Lider di MEP a expresa.

            Lider di MEP, refiriendo riba finansas di nos pais, a remarca riba e elogionan y reconocementonan enormemente grandi cu Aruba y Gabinete Wever-Croes ta hayando no solamente di institutonan di Aruba pero tambe for di institutonan internacional, pa e maneho responsabel cu Gobierno ta hibando. “Nos Meta ta pa crea confiansa y stabilidad pa asina crea oportunidadnan pa mas progreso y prosperidad. Nos no ta crea storia pero cu hechonan ta mustra cu Aruba ta bayendo bon y esaki ta crea confiansa. IMF, Fitch Ratings, e Instituto Hulandes, Economisch Bureau Amsterdam (EBA) y Banco Central di Aruba tur ta di acuerdo cu e maneho financiero di Gabinete Wever-Croes ta un un bon maneho y responsabel”. Lider di MEP a duna di conoce.

            Esaki, Lider di MEP a enfatisa cu lo no tawata posibel si nos no tawata tin un Minister di Finansa manera Minister Xiomara Maduro, kende cu caracter y curason ta traha incansablemente hunto cu departamentonan y profesionalnan concerni.

            Lider di MEP ta gradici Minister di Finansa y e ekipo cu a traha duro pa logra pone finansas publico un biaha mas riba e bon caminda despues di reto tras di reto. Pa cuminsa despues di e disaster financiero cu e gobierno di asignatura berde a laga atras. Pa despues, ora cu tawata mustra cu finansas di nos pais tawata mirando un mehoransa positivo, pandemia mundial a dal nos y a para e progreso cu nos pais tawata bayendo aden.

            Sinembargo, trabou duro, compromiso sincero, dedicacion incansabel, determinacion firme y amor grandi pa nos pais, y un pueblo solidario y uni, a conduci cu awe Aruba ta mas fuerte y resiliente y logrando pa pone finansas publico di nos pais un biaha mas riba e bon caminda.