Luna di Salud na La Cabana Beach Resort & Casino

ORANJESTAD (AAN): La Cabana Beach Resort & Casino a lansa nan actividad di “100 Days To Celebrate U”. 

DIARIO a compronde cu esey ta un serie di actividad y festividad diseña pa expresa aprecio di curason na su empleadonan.

   Den cuadro cu esaki, TLC Committee a anuncia un Luna di Salud cu meta pa encurasha empleadonan pa haci cambionan y brinda informacion amplio riba escogencianan mas saludabel, e beneficionan di tin un estilo di bida mas saludabel y tambe importancia riba salud mental.
   Luna di Salud a inicia cu un presentacion por medio di e resort su Health Club Attendant y Personal Trainer, Naisa Nurse. Naisa a duna un presentacion hopi informativo mes riba cumindanan saludabel y con nan ta beneficia ambos bo curpa y mente. E charla a tuma lugar den e conference room y tabata bon ricibi cu presencia di hopi hende.

   E siguiente siman, facilitador Sofie Slegers di Qi-Gong Aruba a conduci un les di Chair Yoga pa enfoca riba diferente tecnica pa relaha bo mente, pa respira rosea di energia positivo, Ch’I, y pa elimina energianan negativo. Slegers ta enfoca riba e Heart Meridien, y con bo ta influencia e manera cu nos ta sinti fisicamente den un forma positivo.

   Den e siguiente simannan, psicologo Dimitri Halley lo host un lectura, Clementine Eugene lo conduci un tayer di mindfulness y Dwayne Wever lo conclui e luna cu un les di Zumba den e parkinglot di e empleadonan.

   Health Week ta worde organiza na La Cabana Beach Resort & Casino un of dos bes pa aña, den diferente formato, pero na 2022 e resort su Green, Health & Safety Committe a dicidi pa haci esaki un programa pa henter un luna largo, cu enfasis riba loke ta asuntonan relevante y contemporaneo.

   E empleadonan na La Cabana Beach Resort & Casino ta di acuerdo cu felicidad ta cuminsa cu bon salud.