Lugar unico pa Aruba den constelacion nobo Gobierno di Reino

Diez aña despues di supervision, Aruba modelo bon gobernacion

• Presupuesto Supletorio 2024 cu adelanto salarial y areglo VUT
• Aruba ta cende candela di San Juan pa sembra cosecha di futuro

ORANJESTAD (AAN) Aruba ta prepara pa un entrada festivo di e siman nobo su dilanti, den un laman di desaroyonan mundial y den Reino, cu ta papia di problemanan serio cu ta afecta mundo, cu ta den buskeda di bon gobernacion.

Resultadonan di eleccionnan na cantidad di pais grandi, ta entrega e prueba di exigencianan nobo di Pueblo pa bon gobernacion, cu ta atende cu e necesidadnan democratico di Pueblo.

   Durante e fin di siman aki, e celebracion di Fiesta di San Juan, lo haci su entrada cu limpieza di cunuconan cu asina ta wordo prepara pa cosecha cu temporada di yobida lo produci.

   Ta den e situacion festivo aki y na un forma di hubilo, Aruba ta prepara pa topa pronto cu un constelacion nobo di Gobierno di Hulanda y asina un contestelacion nobo di Gobierno di Reino, cu Aruba por enfrenta cu orguyo.

   Aruba, durante celebracion di San Juan lo dera e gay di pasado cu a ataca poblacion di Aruba durante temporada di mal gobernacion, cu na 2014 a habri porta pa autonomia di Aruba wordo silencia, cu entrada di supervision Hulandes.

Mientras Aruba tabata lucha den e maneho financiero cu a destrui e pais for di 2009 y a culmina cu supervision na 2014, Aruba na 2017 a wordo completamente demotiva pa e morto di e soño di entrada di Citgo, e proyecto di Nicolas Maduro cu lo a carga e recuperacion financiero y economico di Aruba, pero a bira desesperacion y paralisis pa e pais, cu na 2017, a keda sin rumbo ora e bira evidente cu e proyecto Citgo, tabata un fracaso.

   Un momento di angustia grandi a surgi den Pueblo di Aruba, cu  mira e promesa di recuperacion economico historico rementa den su cara, mientras medidanan pa paga e debe nacional y proyectonan PPS cu a tranca, a bira peso.

   Na final di 2017, Aruba a dera e gay y e candela di persevera cu ta biba den e alma Arubano, a produci un rumbo politico nobo pa Aruba, cu a acepta su fayo electoral di pasado, y den un ambiente di cambio total a cuminsa cana riba e caminda di recuperacion financiero na 2018.

   Na 2020, desastre di Covid-19 a ataca y a destrui situacion financiero y economico di Aruba, manera e grafico presenta, ta demostra.

   Un gobernacion historico di Aruba a haci, cu den situacionnan nunca bisto den historia di Aruba manera introduccion di reglanan di guera pa por enfrenta e enfermedad di Covid-19 a wordo introduci.

   Aruba a sigui cana y na 2024 ta un modelo den Reino Hulandes, cu pa medio di e Comision di Supervision di Reino, a aplaudi e trabou di Gobierno di Aruba, cu e siman aki a anuncia, con Pueblo ta bay beneficia di logronan alcansa na un pais den recuperacion total.

   Riba tereno economico por nota, anuncio di proyectonan cu lo bay trece sosten enorme pa economia di Aruba, cu basa riba e maneho cu Gobierno Evelyn Wever-Croes a hiba, awe ta haci Pueblo participa den adelanto social cu e recuperacion di Aruba a produci.

   E interrelacion di proyectonan tin resultadonan grandi pa henter economia di Aruba y asina entrada di Gobierno.

  Ora papia di entrada di Gobierno, bon gobernacion a exigi pa papia di un sistema balancea riba tereno financiero.

   Esaki ta nifica, cu ora Gobierno anuncia medidanan popular, manera aumento di entrada cu ta afecta placa di Gobierno, mester anuncia tambe con ta baha gasto of percura pa mas entrada.

   Den e cuadro aki por nota con di un banda Gobierno a anuncia cu su Presupuesto Supletorio, loke por wordo considera un adaptacion di cifranan di e Presupuesto original a base di entradanan y gastonan real cu a wordo registra, lo brinda adelanto financiero na un grupo di persona.

   Si Parlamento di Aruba, manera Ley ta exigi, bay di acuerdo cu e cambionan proponi den e cifranan pa 2024, esaki lo nifica cu  e grupo cu ta depende pa su entrada di placa cu Gobierno ta pone disponibel, lo conoce un aumento di e entrada aki.

   Lo bay ahusta e entrada di trahadornan di companianan di Gobierno tambe na e aumento di costo di bida, si Parlamento bay di acuerdo cu esaki.

   Di otro banda por tuma nota di e decision pa bolbe introduci e areglo di VUT, cu ta permiti empleadonan di Gobierno termina nan empleo den e sistema gubernamental mas tempra y asina yuda baha e gastonan di e pais.

   Pues aki por papia di un balanza.

    Durante e siman cu e termina por a tuma nota di logronan importante di Gobierno pa amplia e calidad di bida na Aruba, cu lo ta topico den combersacionnan cu mester haya nan incio cu Gobierno di Reino proximamente.