Excelencia financiero ta prospecto pa Aruba rumbo 2028
- Aruba na top di prospectonan pa 2024 den Reino Hulandes
- Debe nacional lo baha te 71 porciento na 2028 cu bon maneho
ORANJESTAD (AAN) Kico tabata spera Aruba y mundo na inicio di 2023? Esaki tabata e pregunta di salida di DIARIO, pa por a yega na e conclusion si Aruba realmente por a papia di adelanto na final di 2023.
DIARIO, a base di su deber enfrente Pueblo di Aruba, no ta acepta sin mas loke ningun di e partnernan social den e estado democratico ta bisa.
Investigacion propio y consulta cu expertonan riba nan tereno dor di DIARIO, ta entrega na Pueblo di Aruba, e berdad di loke por spera na e pais, si mundo sigui su rumbo actual y Aruba sigui riba e caminda di excelencia gubernamental cu el a conoce na 2023.
Pa huzga e realidad di Aruba awe y loke e por spera den porvenir, DIARIO a bolbe na entrada di 2023.
Tabata dia 23 di Januari 2023 cu mester a bira y a bira pa un cantidad di pais grandi un aña di recesion, cu medidanan pisa cu paisnan grandi mester a tuma y te awor mester tuma.
E expectativanan di expertonan na entrada di 2023 mundialmente tabata cu mundo lo a conoce un desastre cu na varios pais a wordo registra y a resulta den cambionan electoral grandi.
DIARIO a sigui e pronosticonan di e Fondo Monetario Internacional pa 2023 cu a anuncia cu e crecemento mundial lo a baha pa 2.9 porciento na 2023 pero pa subi cu 3.1 porciento na 2024.
Durante 2023, e informacionnan periodico di IMF, cu mundo ta uza como su punto di salida, a sigui papia di caida den e crecemento mundial durante 2023 y 2024, debi na e realidad cu despues cu mundo a sa di supera e pandemia di Covid-19, e salto grandi di recuperacion lo a bira menos fuerte.
Na mes momento mester tene cuenta cu advertencianan cu a wordo lanza pa e situacion mundial di guera y problemanan serio cu a presenta nan mes.
Den e situacion mundial sumamente pisa di 2023, Aruba a registra adelanto cu sigur a marca historia di maneho di e pais, manera refleha den e cifranan oficial, e presupuesto pa medio di cual un bon gobernacion, ta realidad di e pais.
Segun pronosticonan oficial di IMF, Aruba por spera na 2024 un aumento di 2.3 porciento den su Producto Domestico Bruto (GDP).
Mester pone e logro aki banda di e cifranan cu a wordo presenta pa Hulanda, cu lo registra un aumento di 0.6 porciento di su Producto Domestico Bruto (GDP), loke ta menos cu mitar di e cifra pa Aruba.
Cu esaki DIARIO ta duna testimonio di e motibo cu semper DIARIO ta trece dilanti cu Aruba ta e pais mihor goberna den Reino, sigur riba tereno financiero y economico manera awor ta keda presenta na henter mundo pa medio di e Fondo Monetario Internacional.
Si tuma nota di tur e pronosticonan cu ta wordo haci, Aruba lo sigui cana cu paso firme di progreso te 2028, cu lo bira un momento historico pa Aruba.
Segun proyeccionnan di IMF, na 2028 si continuacion wordo duna na e maneho actual di Aruba, e pais lo baha su debe nacional te 71 porciento, cu ta un logro enorme pa futuro.
E surplus (pues suma extra cu ta opositor di debe) riba termino mediano ora e crecemento di turismo, lo nivela loke ta un proceso normal teniendo cuenta cu e capacidad pa produccion nacional riba e tereno aki.
Na entrada di 2024, notanan positivo ta loke DIARIO a base di cifranan di expertonan internacional mester confirma pa Aruba, cu ta entrega Reino Hulandes un ehempel di bon maneho financiero.
Un bon maneho cu stabilidad, manera refleha den e reservanan nacional di e pais, cu mester sostene un Florin sano.
DIARIO lo sigui informa Aruba na 2024 cu pruebanan riba loke e pais por spera pa su futuro.
