Interes pa petroleo na Surinam ta confirma desaroyo unico di azeta
- Biden ta cera porta di Merca prome cu explosion di refugiado
- Petroleo di Essequibo mester produci placa prome cu salida petroleo
ORANJESTAD (AAN) Manera DIARIO ya pa basta tempo a adverti, e salida di petroleo y entrada di combustibel limpi, lo trece basta conmocion mundial pa motibo di e interes economico cu petroleo ta pa un pais.
Con importante petroleo ta, sigur ta wordo confirma dilanti porta di Aruba, cu awe mas cu nunca segun informantenan clave, mester di vigilancia sumamente pisa den un region cu ta conoce un grado creciente di peliger.
Petroleo ta e arma mas fuerte di Nicolas Maduro sigur for di e momento cu Rusia, cu tabata number dos riba lista di petroleo mundial despues di Merca, ta wordo confronta cu sancionnan dor di paisnan cu no mucho tempo pasa a sanciona Nicolas Maduro pa loke e tabata haci na Venezuela.
Na e momentonan aki, mientras inversionan grandi ta wordo haci pa introduci combustibel alternativa, paisnan productor di petroleo mester sigura cu nan ta registra maximo ganashi di loke petroleo den suelo ta brinda nan.
Con importante Guyana ta pa sector di petroleo, sigur ta bini dilanti den desaroyo na Surinam, caminda e compania petrolero di Estado di Surinam, Staatsolie, a anuncia cu e compania Petronas di Malaysia a descubri presencia di petroleo den e lama pafo di e costa di Surinam.
Manera DIARIO semper a mustra, desaroyonan na Guyana ta sumamente importante pa Suriname, cu den pasado tabata conoci como Guyana Hulandes.
Na 2020 Petronas hunto cu Exxon ya a descubri gas natural den e region, cu ta confirma presencia di gas y petroleo na costa di Surinam, cu segun ta wordo pensa no por competi cu Essequibo, e parti di Guyana cu actualmente Nicolas Maduro kier comberti den teritorio di Venezuela.
Aruba no por ignora loke ta pasando den su vecindario y tin como resultado cu awor mas cu nunca, refugiadonan Venezolano lo mira Aruba como parti di solucion pa crea nan futuro nobo.
Un situacion cu ta desaroya na momento cu Venezuela ta acerca eleccion y Nicolas Maduro ta bira cada rato mas peligroso pero tambe ta haci mas uzo di e poder di petroleo, cu aparentemente ta apacigua e lucha contra di dictadura cu Chavez a introduci y a wordo prolonga pa Nicolas Maduro.
Na e momentonan aki Maduro a bira competencia serio pa Rusia, cu tabata entrega petroleo na cantidad di pais, cu ta contra e Guera di Ukraine, pero ta ignora e dictadura di Maduro cu tin sosten di Rusia.
Un situacion unico ta wordo crea den cual sigur e maneho di Presidente Mericano, Joe Biden, tambe ta hala atencion den e forma cu ta atende cu Maduro na momento cu un decision di Biden den porta di eleccion Mericano, lo tin resultado pa Aruba.
E cantidad enorme di refugiadonan Venezolano cu a busca auxilio na Merca, awor ta topa cu nan realidad ya cu nan no por drenta Merca y hasta ta wordo pone riba avion pa bolbe Venezuela.
Esaki ta haci cu e region Caribense y paisnan Latino Americano den cercania di Venezuela, ta bira e solucion cu ta resta refugiadonan di Venezuela, cu ya den cantidad grandi a logra alcansa e costanan den region di Aruba y Aruba mes.
Informacionnan ta indica cu Seguridad Nacional di Aruba mester ta mas atento cu nunca y cu mester cuido frontera di Aruba mihor cu nunca, debi na e hecho cu e desperacion cu Maduro a crea na Venezuela no conoce limite.
2024 a habri, na caminda pa eleccionnan na Venezuela cu tin tur atencion di mundo cu ta hunga paso doble den hopi caso pa haya petroleo, cu mas exigencia pa seguridad pa Aruba dilanti costa Venezolano mientras e presencia tambe di barconan di guera cu ta prepara pa asisti Guyana, no por wordo ignora!
