ORANJESTAD (AAN) – Formador Evelyn Wever-Croes, den cuadro di e reunionnan cu stakeholders, tambe a reuni cu Aruba Financial Center (AFCA), y den e conferencia di prensa cu a sigui, señor Stanley Looman a duna su impresion tocante e reunion aki.
Señor Looman a menciona cu e reunion a bay hopi bon, unda AFCA a presenta su tres punto principal, aunke tin hopi mas.
E puntonan aki ta: 1. Mas comunicacion y dialogo continuo cu e gobierno cu ta bay sinta, cual a wordo acepta y compronde tambe pa Formador y demas persona presente. 2. Puntonan di Banco Central y e ley di “LBTF” cu nan tur ta respeta, y ta mantene nan na e reglanan aki, pasobra nan ta hopi bon, no solamente pa e sector pero pa Aruba en general.
Looman a agrega cu e puntonan di Banco Central ta cu e maneho di e Ley di LBTF ta hopi fuerte y fuera di tur proporcion. Su pregunta tabata si e no por ta mas suave, mas flexible, y cu por trece hopi mas beneficio pa Aruba tambe. E di tres punto cu AFCA a papia riba dje, tabata ki producto nobo nan mes por bin cune, pa promove y pone e sector financiero crece, pa cual a yega na areglonan cu Formador, y e gobierno cu ta bay sinta lo AFCA lo haci follow up riba esey tambe.
Finalmente, nan a papia di un producto nobo cu ta e “VBA”, cual AFCA ta acepta, pero e manera cu e efectonan financiero cu mester tene cuenta cune, ta mas fuerte y stricto cu tur otro hurisdiccion cu nan tin den Caribe. Formador a priminti AFCA cu lo duna e siguimento tan pronto cu gobierno sinta.
Señor Stanley Looman ta kere cu AFCA ta un sector cu por duna un bon contribucion na Aruba su economia, pero di otro banda nan ta pidiendo mas comunicacion y acercamento cu gobierno, pasobra pa añanan e sector aki no a wordo reconoci ni acepta, ni nan consehonan a wordo teni na cuenta. Den e sentido aki nan kier tin comunicacion mas continuo cu gobieno.
El a splica cu den cambionan den ley cu a tuma lugar den pasado, AFCA a duna su aporte y su bijdrage, pero nunca nan a wordo reconoci como tal.
AFCA haya e impresion, durante e reunion aki, cu Formador sigur, y e personanan cu tabata sinta den e reunion, a mustra interes den e sector aki y nan tin speranza cu nan lo cumpli cu locual a palabra.
