ORANJESTAD (AAN) –Maria Dijkhoff-Pita, director di “Directie Economische Zaken, Handel en Industrie (DEZHI), a haci un introduccion breve di e lanzamento di e website completamente nobo di IDEA (Iniciativa pa Desaroyo di Empresa Aruba), cual a caba di wordo lanza.
Esaki a tuma lugar den presencia di miembronan di prensa y empleadonan di IDEA.
Na prome lugar el señora Dijkhoff-Pita a expresa palabranan di gradicimento pa tur instancia cu a yuda nan cu informacion, pa nan pone den e website ya cu nan tin hopi links cu instancianan di gobierno y tambe den sector priva.
Maria Dijkhoff-Pita a señala cu esaki ta pa duna hopi miho informacion na tur e comerciantenan y personanan cu ta desea di bira comerciante.
El a gradici specialmente e damanan Judella Trim cu ta e motor di e website aki y tambe Louella Ras. Ambos ta forma e team di IDEA, y Maria Pita a expresa cu DEZHI ta masha contento y orguyoso di por presenta e website aki.
https://diario.aw/ar/categories/noticia/general/lanzamento-di-website-completamente-nobo-pa-idea-a-tuma-lugar#sigProId827a6bfae9
