Articulo di Siman -Sea ta pa e bay cuminsa scol of dal un bat pa prome biaha un mucha ta enfrenta hopi situacion desconoci.
Tur mayor kier pa nan yiu tin un actitud di curashi pa enfrenta e retonan y cu tempo nan kere den nan mes. Teniendo na cuenta cu cada mucha ta diferente, mayornan por sigui cierto puntonan general pa yuda nan yiu crea confiansa den su mes.
Confiansa propio ta bin ora bo por sinti cu bo por algo. Cu otro palabra mucha ta desaroya confiansa propio no pasobra su mayornan ta bis’e cu e ta great, pero door di su logro, sea esakinan ta algo grandi of chikito. Ta bon tambe pa mucha tende palabranan di encurashamento di su tata y mama. Pero elogio ta nifica mas ora e ta referi na un esfuerso specifico di e mucha of na abilidadnan nobo cu ela siña.
Ora un mucha logra algo, p.e. skeiro djente of core bais, e ta sinti cu e por y ta capaz pa haci’e. E sentimento aki ta dun’e mas confiansa pa sigui purba.
Crea confiansa propio por cuminsa masha trempan den bida di mucha. Ora un baby por bira blachi di un buki of ora e mucha siña cana, e ta haya e pensamento “Mi por!” Cu cada abilidad nobo e mucha ta desaroya mas confiansa.
Mayor por yuda e yiu door di dun’e hopi oportunidad p’e practica y domina su abilidadnan. Laga e mucha haci fout y percura cu bo tey pa yud’e ora mester y encurash’e. E mester sigui purba. Reacciona cu interes y cu entusiasmo ora e mustra bo con e por un abilidad nobo. Recompens’e cu elogio ora e logra un meta of ora e haci hopi esfuerso.
Un mucha por logra domina abilidadnan basico ora e haya hopi oportunidad pa purba, bon instruccion y hopi pasenshi di mayor. Muchanan por domina abilidadnan basico manera siña mara veter y drecha su cama. Y ora retonan importante presenta nan mes, e mucha por acerca nan cu confiansa pasobra ya e sa cu e tabata exitoso den otro areanan.
Para na banda
Supervision ta importante pa mucha ta safe. Pero pa yuda mucha siña un abilidad nobo ta importante tambe pa bo no keda henter ora riba dje p’e siña. Mester duna e mucha oportunidad pa purba cos nobo, haci fout y siña for di fout. Por ehempel, si bo yiu homber kier siña traha un sandwich di pindakaas, bo por mustr’e con pa trah’e y lag’e purba su mes. E lo mors, esey ta sigur. Pero no core bin yuda ora un tiki pindakaas cai riba mesa. Y miho ta evita critica pa bo no descurash’e. Si bo bin traha e sandwich p’e e lo pensa cu e no por toch. Pero si bo tin pasenshi y duna bo yiu tempo p’e mes siña traha e sandwich, e recompensa lo ta grandi. Un dia e lo bisa “Mi tin hamber, mi ta bai traha un sandwich” e ora bo por contest’e “Bon! Bo por traha un pa mi tambe?” Esaki ta un señal di bo confiansa den su abilidadnan.
Dun’e curashi y mustr’e aprecio
Tin ora bo yiu lo give up. Bo por yud’e door di encurash’e pa sigui purba. Door di purba atrobe e lo siña cu bo por surpasa obstaculonan.
Unabes e mucha logra su meta, bo ta dun’e aprecio. No solamente pasobra ela logra un resultado final, pero tambe p’e hecho cu ela persisti. Por ehempel, despues cu bo yiu a logra traha su sandwich di pindakaas, bo por mustr’e cu bo ta kere den su abilidad door di bis’e “Bo kier siña otro biaha con pa kraak un webo?” Kisas traha un sandwich of kraak un webo no ta parce logro grandi, pero nan ta pasonan importante den e direcion di bo yiu su independencia.
Durante infancia mayornan tin chens pa prepara nan yiunan pa wak pa nan mes, bira independiente. Pareu cu mucha haya mas confiansa den su mes y por ta independiente, su relacion cu su mayornan ta bira mas miho.Y e lo ta gradicido pa loke e mayor a haci pa prepar’e riba e caminda pa futuro.
Fuente: “Raising confident kids”- KidsHealth.
Pa informacion of pregunta por acerca Fundacion Pa Nos Muchanan - Cumana 2
