Advertencia di DIARIO pa lamper, beach y turista a bira realidad
- Turistanan herida a ricibi asistencia rapido di Polis y Hospital
- Region di Caribe y e parti mas activo di temporada di horcan
ORANJESTAD (AAN) Ayera alarma grandi a wordo bati na Sint Maarten, ora autoridad mester a drenta den accion pa atende cu turistanan cu a wordo herida na beach dor di lamper.
DIARIO a ricibi imediatamente despues di e suceso, e prome informacionnan cu ta sostene e atencion cu DIARIO a duna, na e temporada activo di horcan cu lo inclui mas actividad di mal tempo y condicionnan mas severo pa peliger pa hende.
Despues cu super tormenta Beryl a causa drama den region di Caribe, solamente Chris a entrega prueba cu ya e temporada di horcan 2024 a conoce su inicio.
Cu cambio di clima a percura pa un Oceano Atlantico cayente, cu por produci mas y mihor horcan, ya no ta ricibi tanto atencion di hende cu mester ta prepara pa un temporada activo di horcan.
Condicionnan di tempo rond mundo, ta splica con naturaleza ta contesta e forma cu el a wordo trata dor di hende y awor ta produci sistemanan peligroso pa hende y su mundo.
Si despues di Beryl no tabata tin tanto atencion pa horcan, analisis di loke ainda por pasa mester ta sigur basa riba e condicionnan extremo di tempo cu ta hoga un parti di mundo den yobida y ta cuminda pa sistemanan peligroso den e zonanan tropical, cu conoce fenomenonan cu ta haya culminacion den horcan.
Ya e cifranan cu a wordo presenta dor di NOAA, cu ta vigila, informa pa asina prepara hende pa e peliger di fenomenonan tropical, ta mustra mescos cu cifranan di e Universidad di Colorado, cu mundo mester prepara pa aumento considerabel di horcan na 2024.
Ambos instituto cu ta duna pronostico pa e temporada aki, ta papia di mas cu binti sistema tropical cu ta haya nomber na 2024, mas cu diez por bira horcan.
Informacionnan cu ya a wordo duna y cu publico ta scucha na varios ocasion sin preocupa su mes realmente, cu loke esaki ta encera.
Kico ta nifica mal tempo? Kico ta nifica cu cambio di clima ta provoca mas mal tempo?
Recientemente DIARIO a adverti Aruba cu tin turismo como su productor economico grandi, cu mester duna tur atencion na e peligernan cu naturaleza ta produci y cu ta crece den cantidad den e situacionnan di cambio di clima.
Kico por pasa diripiente, a keda demostra ayera na Sint Maarten, cu durante ultimo dianan a conoce condicionnan basta severo di tempo debi na presencia di un ola tropical.
Ora papia di un ola tropical ta papia di e inicio di un sistema cu por bira un horcan y cu ta produci yobida y mal tempo.
Hopi hende no kier realiza, cu cambio di clima ta encera tambe cu e yobidanan dushi di antes, awor ta bira mas fuerte debi na e forma cu nubianan ta wordo alimenta den e calor tremendo.
Mas halto un nubia crece, mas halto su top, mas su chens pa lamper cu ta un peliger na beach y riba awa, manera DIARIO algun siman na inicio di e temporada di vacacion a splica publico.
E condicionnan di tempo cu ta wordo afecta pa calor ta produci mas oportunidad pa strena y lamper cu ta un fenomeno peligroso pa hende.
Lamper ta energia, electricidad cu ta biaha den aire y ta busca coneccion cu suela pa medio di mata, animal y e curpa humano.
Esaki ta hustamente e centro di realidad tristo ayera na Sint Maarten, cu mester a bati alarma grandi.
Cuerpo Policial y otro servicionan manera di ambulance, mester a duna asistencia na personanan cu a wordo alcansa dor di lamper den vecindario directo di laman.
Cinco persona, entre nan tambe turista, a wordo alcansa pa lamper y tres di nan a sufri heridanan di gravedad cu a haci cu nan mester a wordo hospitalisa imediatamente.
E dos otro personanan a sufri herida menos serio.
E suceso tabata tin impacto grandi na Sint Maarten, caminda autoridad mester a adverti hendenan atrobe pa e peligro cu tin pa ta riba beach of den laman na momento cu tin peligro di strena y lamper.
E yamada serio aki ta uni su mes na e advertencianan di expertonan cu a conduci algun siman pasa na e articulo di DIARIO, pa spierta publico pa e peliger cu ta wordo forma dor di tormenta electrico pa beach pa hende, cu no mester hunga cu su suerte y bida..
