ORANJESTAD (AAN): Departamento Meteorologico di Aruba a indica diaranson cu ta acercando e periodo di mas calor di aña, cu ta durante e lunanan di Augustus, September y October.
Durante nan e simannan aki, e temperatura lo ta mas halto di normal, cu un combinacion di humedad halto y biento menos fuerte cu normalmente, causando malestar grandi. Den e lunanan aki, por espera temperaturanan maximo cu por oscila entre 34ºC (93ºF) te 36ºC (97ºF). Porcentahenan di humedad lo ta rond 85% te 90% of mas, cu lo contribui na un indice di calor (temperatura aparente) rond di 43ºC (109ºF) te 46ºC (115ºF) cada dia.
E calor y humedad halto lo no baha mucho anochi, cu temperatura bahando solamente te un minimo di 28ºC (82ºF) te 29ºC (84ºF). Esaki lo aumenta e peligro pa hendenan cu no por haya un lugar adecua pa refresca nan curpa.
Calor excesivo ta e asesino di tempo nr. 1. Hende mester ta prepara pa e peliger cu calor excesivo ta ocasiona. Mucha chikito, hende grandi y hende cu malo di curazon ta esnan mas expone. Limita actividad pafo di cas pa oranan tempran di mainta of ora solo baha. Si bo tin un airco cu ta funciona, uz'e, of a lo menos habri bentana pa laga aire pasa y circula.
Un aviso pa calor excesivo ta nifica cu un periodo di temperatura halto ta wordo spera. E combinacion di temperatura y humedad halto lo crea un situacion den cual malesa causa pa exposicion prolonga na temperatura halto lo por presenta.
Consehonan di precaucion: (*) Bebe hopi likido. (*) Keda den camber cu airco. (*) Keda aleha for di solo. (*) Bisti paña licht di color, preferiblemente blanco. Ta importante pa tuma e medidanan di precaucion aki pa preveni maleza relaciona cu e calor excesivo durante e periodonan di mas calor di e aña.
