Segun Organisacion Panamericano di Salud --- *Aruba cu excelente capacidad di vigilancia y monitoreo
ORANJESTAD (AAN): For di luna di Februari, a elimina tur restriccion na Aruba relaciona cu e maneho di Covid-19 aki na Aruba, esaki den cuadro di e strategia di salida pa asina pronto declara Covid-19 un endemia.
Organisacion Panamericano di Salud (PAHO/OPS) a papia riba esaki den varios ocasion unda ademas ta reconoce cu e severidad leve di e variante nobo ta permiti cambionan den e forma di maneh'e den cada pais, sinembargo, nan ta bisa cu e pandemia ta leu ainda di caba.
Den un conferencia di prensa diaranson ultimo, unda a duna un actualisacion di e situacion di Covid-19, e directora di OPS/PAHO, Carissa Etienne a expresa cu "no por defini cu precision e futuro di e pandemia of ki dia esaki ta yega na su fin. Kizas e casonan a baha, pero tambe tin e posibilidad cu nan lo por subi bek un biaha mas".
Den e caso di Aruba, por constata cu tin un excelente capacidad di vigilancia y monitoreo di e situacion di parti di Departamento di Salud como di tambe CrisisTeam hunto cu gobierno. Pesey no mester tin duda cu e decisionnan cu a wordo tuma tin su tras un evaluacion corecto.
Mester agrega cu OPS/PAHO, a indica cu e reforsamento of flexibilisacion di e medidanan ta depende di e escenario di e casonan nobo, e capacidad na Hospital y e fayecimentonan relaciona cu e virus.
Actualmente na Aruba, e situacion cu e pais ta enfrenta ta permiti aplica cambionan den e medidanan y te hasta elimina nan, ya cu tin evidencia di un impacto menor di Covid-19. Tur esaki relaciona cu e cantidad di casonan nobo raporta diariamente.
Sinembargo, mester tene cuenta tambe cu e situacion por cambia, pa motibo cu esaki ta un virus impredecibel cu lo por genera un variante nobo. Akinan e autoridadnan di e isla lo mester tuma decisionnan pa bolbe implementa medidanan cu lo por reduci e impacto di e malesa den e ciudadanonan.
Locual si ta confirma ta cu e pandemia aki lo dura ainda un tempo mas, pero tambe ta necesario implementa medidanan pa recupera e actividad di otro sectornan y tambe e economia di e isla.
