ORANJESTAD (AAN)—Kiwanis Club di San Nicolas, a instala un miembro nobo cu a ricibi e titulo di “Honorary Membership”.
Esaki a wordo otorga na e hoben Thessaly Zimmerman, Miss Universe Aruba.
Asina e Presidente di Kiwanis Club San Nicolas, Endrah Richardson-Gumbs, a duna di conoce den entrevista cu DIARIO. El a agrega cu durante nan celebracion di dos aña di a wordo lanta, a lanza nan proyectonan nobo cu ta “Smile Drive” y “K- Pop Up”.
“K-Pop Up” ta un proyecto cu nan a haci aña pasa caba y e tabata sumamente exitoso, y pesey nan ta hacie un biaha mas na fin di Januari aki. Tambe tin otro proyecto cu yama “Smile Drive” unda nan ta bay brinda e muchanan den necesidad un sonrisa nobo, hunto cu docter John Hernandez. E muchanan ta bay ricibi un “saneringbrief”, cu cual nan por bay dentista henter e aña pa haya e tratamento cu nan mester.
Nan a celebra no solamente e miembro honorario Thessaly Zimmerman, pero tambe e lanzamento di e dos proyectonan 2022, y ademas e hecho cu nan a ricibi e titulo di “Distinguish Club of Canada and Caribbean”. Endrah a subraya cu nan ta hopi orguyoso cu loke nan ta logrando y kier a yama danki na pueblo di Aruba.
Daphne Connor, director di e Comision di Fundraising di e club, a indica cu e K-Pop Up lo tuma lugar e fin di siman aki, cuminzando awe, Diabierna 28 di Januari, di 5 or di atardi pa 8 or di anochi. Nan lo tin paña y accesorionan di masha bon calidad, tanto pa hende homber y hende muher como pa mucha. E prijsnan ta hopi bon. E actividad aki tambe ta riba Diasabra di 9 or di mainta pa 6or di atardi y Diadomingo di 2 or pa 5 or di atardi. E lo tuma lugar na otro banda di caminda di edificio ex-Codemsa na Cumana, bao tent y nan ta cumpli cu e protocolnan di DVG encuanto covid-19 y lo conta cu suficiente espacio.
