ORANJESTAD (AAN) -- Aunke e gobierno nobo no a sinta te ainda, KvK, ATIA y CUA, a dicidi di sinta hunto y cuminza splica pueblo, kico ta pasando, pa loke ta trata aumento di prijs riba tur producto na Aruba;
y asina, conhuntamente manda un carta pa gobierno pa splica e situacion aki, y wak si nan por sinta cu nan, pa busca un alivio pa pueblo.
Lamentablemente, e produccion local ta hopi minimal, cu Aruba ta hopi leu di por cubri tur e necesidadnan alimenticio, riba nos mes mercado.
Tin iniciativanan localmente, cu Francis Saladin ta aplaudi, y ta hopi great di wak cu gobierno tambe a tuma iniciativa di yuda nos productornan, pero realidad ta cu Aruba ta hopi leu di por abastece nos mercado.
E representantenan di ATIA y KvK a declara cu nan hunto cu CUA, tin un carta cla pa gobierno, den cual nan ta splica cu e solucion cu nan ta kere ta esun di mas importante, ta esun cu ta wordo uza mundialmente awo, unda na lugar di bay den prijs pre-covid cu ta encera otro sistema pa calcula invoerrechten, cu ta yuda pa e prijsnan na Aruba no ta desproporcional, manera mundialmente. Door cu bo ta cobra awo riba prijs plus cos pa e producto yega Aruba, awo si ta bay kita e pida ey, e freight ta bay wordo hinca den e prijs “so &so” pa un producto final na Aruba. Pero aworaki cu e prijs ta wordo calcula riba e freight tambe, e prijsnan na Aruba ta subi di forma desproporcional, compara cu mundialmente.
Esaki ta nifica cu na Aruba tin un doble incremento di prijs. Pa loke ta trata e tema di importacion for di paisnan importado mas cerca, nan a menciona cu Aruba ta cumpra hopi producto di paisnan di Latinoamerica y regional.
El a splica cu e mercado di Latinoamerica su flete a subi cu mas di 67% caba, compara cu aña 2020 y Brasil a subi casi 500%. Brasil tabata cobra 3 mil dollar pa container na 2019, awo ta casi 15 mil dollar nan ta pagando pe.
“Pesey nos ta boga pa freight, pasobra esaki ta e unico manera cu nos localmente, cu nos por mitiga e aumento di prijsnan”, nan ta señala, reiterando cu pesey e freight ta importante, pasobra Aruba no por haci nada cu prijs di mundo, pero e prijs di freight si, akinan por traha riba dje.
Aunke e decision ta den man di gobierno, pero e instancianan aki ta bay puntra gobierno pa sinta cu nan pa nan splica e situacion miho, y bin cu ehemplonan con gobierno por yuda pa e prijsnan, cu di facto ta bay subi, no subi di forma desproporcional, pa asina stagna inflacion, cu ta e aspecto di mas importante pa e florin di Aruba tambe.
