Kier introduci un programa educativo di scol pa cas na television

ORANJESTAD (AAN): Recientemente Minister di Enseñansa y Deporte, Endy Croes, a reuni cu director di Tele Aruba, sr. Giovanni Kock.

E reunion a bay den un ambiente ameno y a elabora riba diferente proyecto manera entre otro; un programa educativo di scol pa cas.

            E meta di e proyecto ta pa trece lesnan general di tur materia den curriculo di cada nivel di scol na television den idiomanan Papiamento, Ingles, Hulandes y Spaño. Di e manera aki yuda enrikece e desaroyo di cada alumno di chikito te grandi. Tambe tin como meta pa yega den tur hogar, pa asina niun mucha/hoben/ adulto no keda atras.

            Television Educativo ta un serie di programa cu lo wordo presenta tur dia cu diferente materia segun cada nivel di enseñansa. E lesnan lo wordo duna pa nos docentenan. E programa lo inicia na 2022 via di Tele Aruba.

            Alabes a trata e posibilidad pa Tele Aruba transmiti e weganan di Grandes Ligas di nos astro Xander Bogaerts. “Esaki ainda ta un punto di negociacion”, e mandatario a enfatisa.

            E maneho cu Ministerio di Enseñansa, lo aplica como compas den e proximo 4 añanan ta e “Sustainable Development Goal” number 4; calidad di enseñansa esaki lo dirigi nos maneho pa yega na solucionnan y mehoracion den enseñansa di nos pais.

            Enseñansa ta un di e motornan di mas poderoso cu ta comproba cu ta garantisa desaroyo y sostenibilidad. Minister Endy Croes su deseo y empeño ta pa soluciona problematicanan mas tanto posibel, crea espacio pa trankilidad, paz y mehoracion den e tereno di Enseñansa.