Kerki Protestant na Playa ta cumpli 200 aña

*Celebracion via diferente actividad den luna di December 

ORANJESTAD(AAN): E aña aki e kerki Protestant na Playa ta cumpli 200 aña y relaciona cu esaki tabata tin un conferencia di prensa Diaranzon mainta.

Durante e conferencia di prensa pastoor Jan Rinsema, kende tin 4 luna na Aruba, a bisa cu e ta contento di ta bek riba e isla.

Rinsema a papia un tiki di e historia di Protestantismo na Aruba, unda cu na 1822 esaki a yega nos isla.

“Protestantismo a yega Aruba na 1822 cu e Hulandesnan y tambe cu hopi idealismo”,

Idealismo di famianan Eman, Laclé y Beaujon, kendenan na 1822 a cuminza Protestantismo na Aruba y awe ainda nos tey, segun Rinsema.

El a sigui bisa cu e temponan ey nan tabata tin hopi idealismo, nan a construi nan iglesianan na Playa y Piedra Plat, nan a construi nan scolnan desde 1822 y awe ainda e iglesia Protestant ta uno vibrante.

“Nos ta un iglesia vibrante cu 4 localidad, esta Seroe Colorado, San Nicolas, Piedra Plat y Oranjestad”.

Nos misanan ta den tres lenguaje, esta na Ingles, Hulandes y Papiamento, segun e pastoor.

Nos ta invita bo pa comparti nos alegria cu Dios ta na Aruba, via nos actividadnan tambe.

Esaki segun Rinsema, kende a indica cu ta bay tin diferente actividad den luna di December, pa celebra 200 aña di existencia di e Kerki.

Diasabra dia 10 di December ta cuminza cu un anochi unda cu diferente orador ta bay papia entre otro di historia di e misa, incluyendo Prof. Dr. Wim Rutgers, Drs. Leon Berenos y Drs. Peter Scholing.

 E siman siguiente riba 17 di December ta bay tin un bunita anochi di musica y canto, unda cu varios musico lo presenta cancionnan, musica y poesia di Pasco.

Diasabra dia 24 di December ta bay tin un misa di Noche Buena cu e tema ‘Luz den un mundo scur’, mientras cu Diadomingo dia 25 di December ta bay tene un mainta di Pasco cu henter famia, cu ta cuminza 10:30.