JVO St. Maarten a resulta den varios compromiso importante pa husticia den Reino

ORANESTAD (AAN): Informacion for di Philipsburg, ta indica cu den fin di siman den oranan di mainta a cuminza cu e ultimo sesion di e Justitieel Vierlanden Overleg (JVO) na Sint Maarten,

den cual Minister di Husticia mr. drs. Arthur Dowers, hunto cu su coleganan Minister di Husticia di Sint Maarten Nathalie Tackling,  Foort van Oosten di Hulanda y Charles Cooper di Curaçao (representando Minister Shalten Hato) a bin hunto pa yega na acuerdonan importante riba tereno di Husticia.

   Esaki den cuadro di e esfuersonan pa fortifica e lasonan den Reino cu e meta principal pa garantisa siguridad pa e comunidadnan den Reino. Ta trata aki di palabracionnan haci pa combati entre otro crimen organiza y crimen cu ta mina nos estado di derecho, e necesidad pa extende e capacidad di personal pa combati traficacion di droga di Sur America via Caribe pa Europa y vice versa. Ademas a acorda maneho di cooperacion den area preventivo pero tambe den cuido forensico riba e islanan.

   Na final di e sesionnan di JVO a acorda varios punto di interes na bienestar di husticia di cada pais den Reino.

   Por wak atras riba algun dia intensivo di reunion y decisionnan durante e sesionnan di JVO na Sint Maarten entre ministernan di husticia di Reino y ehecutivonan den ministerio di husticia di cada pais participante cu hunto ta traha pa fortifica e compromiso riba nivel di husticia pa garantisa e siguridad den Reino.