Futuro generacionnan lo gosa y conserva e Proyecto Kas Ariba:
ORANJESTAD (AAN) – Señor Joy Werleman, promotor di e proyecto di Kas Ariba, a hiba palabra durante e presentacion di e proyecto aki, door di Minister Dangui Oduber.
Werleman a expresa cu e ta hopi contento di wak termina e prome fase di e anker y a indica cu e fase 2 ta bay bira algo mas bunita ainda; e lo bira un conhunto door di un mezcla di tur cos, no solamente pa e localnan pero pa e turistanan tambe.
El a menciona e siguiente actividad cu ta bay tin riba e plaza, cu ta weganan popular, celebracion Dia di Betico Diahuebs, Dia di Himno y Bandera cu ta bay tin tur e weganan popular conoci, y weganan nobo cu cada bez nan ta improvisa, y ta bay concentra riba e palo seba y balansamento di auto, cu ta algo hopi gusta y cu pa Dia di Rey ta bay continua cu ne. Y ya despues, pa final di aña e ambiente di Pasco y Aña Nobo tambe lo tin actividad.
Ora e proyecto di Kas Ariba ta completamente cla, e ta bira pa uso di comunidad, unda cu scolnan, clubnan di baile lo por entrena akinan, y tambe evento pa haci donacion.
E ta manera un tereno multifuncional y aworaki e ta haya mas idea, cual ta bunita pasobra tin cu concentra riba turismo, y e idea ta pa pone algo similar na loke tabata tin antes, manera “Arubian Nights” (Anochi Arubiano) cu a haci’e pa turismo, pues ta ideanan nobo cu por bin ariba.
Pa e esfuerzo aki el a gradici Gobierno di Aruba cu a haci su best. Werleman ta sumamente contento y gradici di parti di e Comision Kas Ariba, no solamente su persona pero e otronan cu cual ta traha conhuntamente, y a haci esaki posible. Cu e proyecto aki nan tin un vision, nan ta wak’e pa e futuro generacionnan sigui goza di e weganan popular, mantene e lugar aki bunita, y bira un ehemplo pa e otro areanan di Aruba tambe.
Werleman a expresa palabranan di danki pa Minister Dangui Oduber, cu a kere den e proyecto aki, na ATA cu sigur ta un bon partner, DOW y DIP cu a yuda pa por realiza e proyecto aki. Finalmente, el a gradici e boluntarionan di Kas Ariba.
