Jan y Maria Lobrecht ta conta con Grupo Scout Casibari a wordo lanta 50 aña pasa

ORANJESTAD (AAN) – Señor Jan Lobrecht ta un di e motornan di scouting na Aruba, hunto cu su señora Maria Koolman. El a lanta mayoria grupo scout for di San Nicolas te na Playa. E mes a cuminza den e mundo scout siendo un mucha di 12 pa 13 aña.

Manera a splica caba Jan Lobrecht a lanta mayoria di grupo scout na Aruba, pero e tempo ey el a traha mas tanto cu mucha homber, y su casa, cu el a conoce riba tereno di scout tambe, tabata traha cu esnan chikito te cu 11 aña, y Maria a keda com 40 aña cu e bunita labor aki.

Jan Lobrecht a conta, den entrevista cu DIARIO, cu e grupo cu cual el a lanta cune for di chikito ta Sint Joris Groep. El a splica cu tur e gruponan cu el a traha cu nan tabata existi caba, pero nan a cay. E hendenan a bay for di Aruba, e gruponan no tabata traha mas, y el a yuda nan rebiba bek. Despues di a yuda algun grupo rebiba, el a lanta Santanero Groep.

Jan Lobrecht a splica pakico e nomber Santanero. E grupo a nace den Dakota. Lago a duna nan un barak largo, despues cu e bestuur cu tabata tey a bay. E ora ey porta y bentana di e barak a cay y bao di un di e portanan tabata tin mas cu 20 santanero.

Lobrecht a spanta di wak e 20 culebranan aki, a keda frio, y laga e porta cay bek. E ora ey el a bay busca un refresco na un toko y a bin bek. Despues el a drecha e edificio y eyden a lanta su grupo scout, cu el a pone e nomber Grupo Santanero.

Prome cu esey el a puntra e muchanan un nomber pa e grupo, pero e no a keda mucho contento cu e nombernan cu nan a trece dilanti, anto el a bisa nan pakico e kier yama e grupo Santanero.

Seguidamente, Jan Lobrecht a bay Piedra Plat, unda el a lanta e Grupo Casibari Jan Lobrecht. E grupo aki a wordo lanta despues cu Jan y Maria a casa na 1969, y nan a lanta e grupo na 1970, den nan mes cas.

E muchanan cu a forma e prome grupo Casibari aki, nunca a scucha di Padvinderij y asina e pareha Lobrecht a lanta e grupo cu 20 pa 30 mucha den nan cas. Ora cu e grupo tabata bon funda, nan a bay na un parada na San Nicolas.

E muchanan cu a bira scout den e grupo aki, hopi di nan awendia ta profesional bon para. Un di nan cu Maria a menciona, ta Joselito Dirksz,  Lider di sindicato di polis “SPA”.

Despues, señora Olga Leo (ruman di Daniel Leo, cu Maria a expresa cu e dama aki tabata fantastico, a bin wak con e grupo ta traha y bay cerca e personanan cu tabata maneha e veld na Piedra Plat y pidie pa e grupo y nan a haye di regalo.

Olga Lacle a yega su nomber hunto cu di Jan y Maria Lobrecht y te awe e tin nan nomber. Tur e Leidster a bin wak e veld y nan a guste hopi y despues esaki a bira e club mas grandi cu prome tabata NPG (Nederlands Padvinder Gilde) y despues APV (Arubaanse Padvinder Vrijnegen).

Na April ultimo, Jan Lobrecht a haya reconocemento for di Minister Xiomara Maduro, como fundador, hunto cu su Grupo Casibari, en ocasion di su 50 aniversario realizando un trabao excelente den e formacion di muchanan scout y lider.