Islanan den Caribe Hulandes ta celebra Earth Hour

Diasabra awor

ORANJESTAD (AAN): Diasabra venidero, gobierno- y empresanan riba tur 6 isla den Reino Hulandes ta uni forza pa naturalesa durante WWF-Earth Hour. E luz di brugnan y edificionan y e luznan di caya na diferente luga lo ta paga pa un ora como señal pa e naturalesa sensitivo cu ta bou di menaza di entre otro cambio di clima.

   Wereld Natuur Fonds (WWF-NL) ta e forza tras di Earth Hour na Hulanda, pero entretanto eventonan ta ser organisa spontaneamente den henter e pais. WWF-NL a acerca gobiernonan y empresanan den Caribe Hulandes pa participa den Earth Hour cu ta tuma luga mundialmente dia 23 di mart di 8:30 pm te cu 9:30 pm ora local. E yamada aki a haya sosten masivo.

   Cu cooperashon di organizashonnan gubernamental na Aruba, Bonaire, St. Eustatius y Saba, lo bay paga luz na varios lugar.  Tambe sa ricibi bon cooperacion di Hotelnan na Aruba cu ta paga luznan pafo.  WWF-NL ta invita comunidad local tambe pa partisipa na Earth Hour.

   E participacion di e islanan Caribense na Earth Hour ta mustra e dedicacion pa pone atencion na e consecuencianan di cambio di clima cu nos ta sinti mas y mas pa dia. Islanan chikito ta extra vulnerabel pa cambio di klima. Debi na subida di nivel di laman y e mundo cu ta calentando, e chance pa tempo extremo manera secura extremo, inundacionnan pisa y horcan, ta hopi grandi. Esaki tin un impacto grandi riba economia di e islanan, bienestar y prosperidad di poblacion.

   Earth Hour ta un iniciativa anual di e organizacion internacional WWF (World Wide Fund for Nature). E iniciativa a cuminza na 2007 na Sydney, Australia como un accion riba un escala chikito pa pidi atencion pa cambio di clima. Den e siguiente añanan esaki a crece bira e movimento mundial di mas grandi pa proteccion di naturalesa.

   Ademas di pagamentu di lus, WWF ta pidi pa haci algo positivo pa mas cu 60 minuut na bienestar di nos mundo (p’esei ta usa e logo di 60+). Esaki por ta por ehempel: come mas cuminda vegetariano/vegan, haci mas na reciclahe, planta palo, etc.