Otro siman OPEC mester rueni pa tuma decisionnan clave --- *Kico lo pasa cu hende cu ta depende di entrada di petroleo? --- *Con poblacion mundial mester ahusta den tempo record?
ORANJESTAD (AAN)- Dia 2 di Februari OPEC te reuni. Den e reunion aki mester wordo dicidi riba produccion di petroleo pa cual tin un demanda enorme.
Hustamente e condicionnan di tempo ta crea mas necesidad pa producto petrolero na e momentonan aki, cu mundo a bisa cu tur atencion lo ta dirigi riba adaptacion na cambio di clima.
Ta hustamente e deliberacionnan cu ta habri 2022, ta duna prueba di e trabou pisa cu mundo tin pa pone un fin na e era di petroleo y gas na e forma cu nos conoce actualmente. Loke esaki ta encera na prome lugar ta, cu un fuente enorme di entrada mundialmente ta desaparece.
Kico petroleo a haci cu bida di hende directamente a keda ilustra sigur na 1930 y gas na 1950 na Merca.
Personanan cu tabata tin propiedad cu a resulta di tin petroleo of gas den suelo, di un momento pa otro a bira rico. Pero den e circumstancia aki tambe, tabata tin un comprendemento cu awe no ta existi practicamente.
Cuanto tempo mundo por sigui saca cuanto petroleo y gas for di suelo? Con grandi e depositonan ta pero tambe con e ta afecta subsuelo?
Tin dos ocasion cu Aruba por a tuma nota di e resultado di saca gas of petroleo for di suela.
Uno di nan tabata e teremoto cu a dal Venezuela y a destrui partinan di Caracas basta tempo pasa.
Na Hulanda actualmente na Groningen cantidad di persona a perde nan cas debi na temblornan ocasiona dor di explotacion di gas.
Pues sin e cambio di tempo, petroleo y gas tabata un problema pa futuro. Cambio di clima a trece un exigencia mas grandi pero ta cambio di clima mes ta produci e invierno sumamente pisa y friu na Merca y na Europa cu mester di petroleo y gas pa genera calor.
Na 2022 e forma cu ta atende cu e asuntonan aki, mester ta basa riba mas informacion directo na publico, cu finalmente mester haci uzo di solucionnan cu ta presente.
Cambionan grandi mester wordo haci dor di ciudadanonan di tur pais den nan bida. Cambionan cu lo costa placa, ya cu loke tin awor lo stop di existi.
Nos ta papia aki di e hecho cu poco poco pero sigur prome cu 2050 tur auto cu ta uza gasoline y diesel mester di otro combustibel por ehempel.
Con ta cushina si scrap gas? Publico ta prepara? E ultimo aki por bira e problema mas grandi.
Kico publico mester haci? Durante e tempo cu a resta pa 2050 cuanto placa publico mester inverti pa cambia di vehiculo, cambia tur loke ta uza gas y petroleo?
Electricidad lo haci su entrada. Pero e electricidad mundialmente mester cambio di e producto basico pa su generacion.
Aki den un tempo record comunidad mester bay biba cu introduccion di elementonan cu e ta considera peligroso te awor.
Den menos cu trinti aña mundo mester cambia drasticamente. Kico ta pasa cu tur e doñonan di negoshi petrolero?
Den nan seno ya ta cuminsa mira con ta bay produci energia limpi, energia berde. Con ta bay haci gas natural mas limpi. Na Europa ya discusion riba e hecho si por yama gas un energia limpi.
Mundo a tuma decisionnan pisa riba cambio di clima na final di 2021. Con ta comprimi tur loke mester pasa den e tempo cortico pa ehecucion di tur plan?
Con ta duna Pueblo mas informacion no solamente di e cambionan industrial pero e cambionan cu lo mester tuma luga den bida directo?
Manera DIARIO a adverti 2022 ta anuncia cambionan grandi riba tur tereno. Cambionan cu lo haci hende duna atencion na e mulina di biento. Cambionan cu ta hiba hende atrobe na comunidadnan rond mundo cu tabata uza forsa di awa pa luz cende den cas.
Nos lo sigui analisa tur loke ta pasa y pone sucesonan enfrente realidad.
Riba termino corto pues e reunion di OPEC pa dicidi cuanto petroleo lo tin riba mercado y e prijs cu asina lo subi of baha, mientras e pregunta mas grandi ta keda sin constesta. Con mundo ta bandona petroleo y kico esaki lo nifica pa pan di trahadornan pero tambe pa e bida di tur dia cu nos conoce awor.
Placa ta sigui lora sigur mientras companianan grandi di petroleo y di gas, ta trata na cambia nan productonan na cambio di clima.
