Inversion cuantioso den proyecto di Revitalisacion San Nicolas

Ministro Geoffrey Wever ta anuncia:

ORANJESTAD (AAN): Den un conferencia di prensa dialuna, 2 di september, minister Geoffrey Wever, hunto cu minister Ursell Arends, a anuncia cu pronto lo desvela e proyecto di Revitalisacion di San Nicolas. Durante e ultimo lunanan, e ministerio di Asuntonan Economico, den consulta cu varios stakeholders, a traha un plan pa revitalisa e area di San Nicolas central. Despues di finalmente a ricibi aprobacion di e conseho di minister pa aloca fondonan adicional, e proyecto aki ta cla pa worde ehecuta, y lo inicia cu un destaho publico na comienso di october.

   Na aña 2022, durante e prome lunanan di gobernacion, a organiza un YES Summit caminda diferente stakeholders y miembronan di e comunidad di San Nicolas a ser invita pa dialoga riba temanan crucial pa desaroyo di e area. Basa riba e feedback ricibi durante e YES Summit, e ministerio di Asuntonan Economico a desaroya un plan holistico pa e revitalisacion di San Nicolas, den diferente fase.

   E vision grandioso pa e proyecto ta eventualmente conecta e centro di San Nicolas cu lama. Un di e sugerencianan ricibi durante e YES Summit tabata pa crea un conexion entre e mainstreet di San Nicolas pariba y e mainstreet pabou, cu actualmente ta worde trata como dos area separa.

   Fase 1 di e Proyecto di Revitalisacion di San Nicolas lo inclui e creaccion di un Sunrise Market den e parkeerplaats actual di Arubus, mantencion y modernisacion di e terminal di bus, ampliacion di e espacio publico pa peaton, y e desaroyo di espacio publico cu posibilidad pa precario, pa asina por crea espacio pa terras y actividad di horeca. Tambe lo tin mas iluminacion, matanan, y infrastructura cu ta atractivo pa bishitantenan.

   E proyecto ta un inversion significante di mas di 4.3 miyon Florin di parti di gobierno di Aruba. Esaki lo worde ehecuta den colaboracion cu e ministerio di Transporte y Naturalesa, bou cual e tereno di Arubus ta inclui.

   E creaccion di e Sunrise Market ta representa un oportunidad hopi bon pa agricultor y artesanonan, pasobra lo tin suficiente espacio pa ofrece mercado pa productonan local, algo cu hopi tempo a worde desea y ta necesario pa diversifica e atraccionnan di San Nicolas, no solamente pa turista, pero tambe pa locanan cu por disfruta di e area regularmente.

   Aki e plan ta no solamente pa trece bida nobo na San Nicolas, sino tambe pa crea un experiencia unico pa tanto turistanan como locanan. Proximo siman lo tin e desvelo oficial di e proyecto.