Interes hopi halto mes pa e Job Fair di DPL hunto cu Iberostar Hotel

Richenel Stamper:

*Lo evalua si mester tene un na San Nicolas 

ORANJESTAD (AAN) – Richenel Stamper, Vocero y HR Staffunctionaris na DPL (Departamento Progreso Laboral), a elabora tocante e Job Fair, cu a cuminza Diahuebs 11 y ta sigui awe, dia 12 di Januari, di 9 or di mainta te cu 3 or di atardi, realiza conhuntamente cu e Hotel Iberostar, cu lo habri e aña aki, pues na 2024.

            Stamper a expresa cu esnan cu ta buscando un trabao ta mas cu bon bini pa aplica pa un trabao, den e hotel menciona.

            E solicitantenan mester a presenta cu nan CV y ID valido pa wordo registra tambe na DPL. E proceso ta cu nan ta bay registra tur hende na DPL, y na mesun momento DPL ta referi e persona na e funcion den e hotel.

            E encarga cu Recurso Humano di e hotel mes ta presenta na DPL, pues e solicitante ta haya un entrevista di biaha, y esaki ta un diferencia.

            Diahuebs cu awe e solicitante ta haya chens di papia cu un persona di Recurso Humano, unda e ta solicita y presenta tur su documentonan y despues lo tende kico ta e resultadonan di esaki.

Iberostar ta buscando tur funcion den e hotel, pues di abao te cu ariba, y tur ta habri. El a papia di un suma hopi halto di trabaonan vacante, cu tin na e momento, y pesey tin hende presente cu a bay aplica pa tur funcion di e hotel.

            Tin hende cu experiencia, tin cu a presenta pa prome biaha y tur ta wordo bon ricibi. Despues di e dos dianan aki lo evalua con e feria di trabao aki a bay, pa wak si mester haci’e un biaha mas of si mester bin cu un na San Nicolas.

            DPL tin un oficina na San Nicolas tambe, pero e job fair aki a tuma lugar na Playa so, mirando e magnitud di hende, mientras cu e oficina na San Nicolas ta hopi chikito.

            DPL ta evaluando si ta necesario haci un feria di trabao pa e hotel menciona na San Nicolas, den un localidad mas grandi, pa esnan biba pariba di brug.