DIARIO a hiba Aruba na cuna di e sucesor San Pedro y Papa Francisco
*Hende den comunidad moderno tabata e lucha di Papa Leo XIII
*Regreso pa “Rerum Novarum” na defensa balor di hende na 2025?
ORANJESTAD(AAN)—Na e momento cu DIARIO a presenta su articulonan relaciona cu morto di Papa Francisco, cu a coincidi cu Pasco Grandi, el a hiba Aruba na Saint Patrick Cathedral na New York, caminda turistanan di tur parti di mundo a reuni pa celebra Easter Parade un dia prome.
Un dia despues cu fotonan di celebracion di Easter Parade a alcansa mundo, Saint Patrick Cathedral atrobe a drenta noticia pa papia di e Santo Sacrificio di Misa di Reqiuem relaciona cu morto di Papa Francisco.
Den e articulo a wordo papia di e representacion di Merca na eleccion di un Papa nobo dor di Cardinalnan, entre cual Cardinal Timothy Dolan, conoci como Arzobispo di New York.
Durante ultimo dianan Cardinal Dolan tabata hopi den noticia internacional ora el a mustra cu e eleccion pa un Papa nobo lo ta dificil, mientras el a enfatisa riba e trabou sumamente importante cu ta spera un Pontifice nobo.
Ayera, despues di dos dia di reunion di Cardinalnan pa scoge un Papa nobo, Cardinal Dolan por a felicita otro miembro di e delegacion Americano na e reunion crucial pa futuro liderazgo di Iglesia Catolico ora votacion a dicidi cu ta un Cardinal Americano lo a bira e dirigente nobo di Iglesia Catolico na mundo.
Cardinal Robert Provest a bira e dirigente nobo di Iglesia Catolico, cu mester bira e voz moral di Iglesia Catolico cu te awor ta e iglesia mas grandi na mundo.
E voz profetico di Iglesia mester ta di acuerdo cu e situacion mundial y e balor di hende mester ta central.
E nomber cu Cardinalnan scoge pa nan hiba como Papa, ta duna un indicacion di e tereno mas importante den nan lucha cu nan mester hiba den defensa di hende, nucleo di creacion y universo segun Religion Catolico.
E nomber Papa Leo IV, pa cual e dirigente nobo a scoge, ta Papa Leo IV, cu ta acentua e lucha di Iglesia Catolico pa e balor di hende den comunidad, cu sigur a worde acentua pues dor di Papa Leo XIII, kende a presenta na mundo enciclica Rerum Novarum, den cual e base social di Catolicismo a wordo expone.
Na momento cu a wordo anuncia cu Papa Francisco a despedi di mundo, DIARIO a mustra cu e punto central pa un dirigente di Iglesia Catolico sigur ta bira, e base moral cu ta atende cu e dignidad di hende como balor basico Cristian.
E nomber di e Papa nobo pues ta duna indicacion cu mundo en berdad por spera discusion serio riba cierto terenonan den doctrina Catolico.
Den Rerum Novarum acento a wordo pone riba e papel di hende den socialismo pero tambe den materialismo individual radical.
Te con leu por bay cu hende den un mundo di adelanto tecnologico continuo te na un punto cu inteligencia artificial a bira un amenaza pa e hende.
Den e sistema socialista, no ta hende pero e produccion di hende na interes di estado cu ta dicidi completamente pa hende, ta central. Den e sistema materialista individual extremo, tambe e hende ta wordo somete na e interes material, sin cu ta tene cuenta cu e bienestar di e hende.
Informantenan a mustra DIARIO cu na e momentonan aki por papia di drama di hende na sigur e continente Americano, caminda refugiadonan social ta pasa den problema serio.
Na mes momento e sistema comunista/socialista ta trapa riba e derecho humano pa poderosonan den gobierno keda central.
Informantenan a indica ayera na DIARIO, cu eleccion di Papa Leo XIV, ta papia di un continuacion di e forma cu Papa Francisco tabata lucha pa e identidad di hende como Yiu di Dios y e balor di e ser humano den creacion.
E amenaza mas grandi di hende ta sconde den e avance di Inteligencia Artificial, cu no por bira vehiculo di amenaza di hende riba ningun tereno pero mester sirbi bienestar di hende, cu entre otro mester por sigura su pan di cada dia pero tambe su integridad humano.
Informacionnan ta mustra cu den e dirigente Catolico nobo, mundo lo conoce un Papa propio di su tempo cu un voz profetico cu no ta permiti pa ningun condicion di bida of convivencia, deshaci di e derecho di hende como yiu di Dios.
Consehero di Papa Francisco, Papa Leo XIV tabata influente den nombramentonan importante den direccion di Iglesia Catolico.
Ayera mundo a saluda un Papa nobo na un momento di crisis mundial tanto debi na guera como desaroyo di e ser humano a base cientifico, politico, social y migracion.
Chicago, centro industrial di Merca lo entrega mundo su prome Papa, cu mester logra loke ni Nacionnan Uni na e costa Atlantico Mericano, a logra for di fin di Segunda Guera Mundial cu a destrui balor di hende den confrontacion cruel, pero tambe a habri porta pa inventonan y pensamentonan cu a comberti e sensacion negativo di poder, den e balor mas grandi y destructivo pa balor di hende, cu awor kier reemplaza cu robot!
