Minister Gerlien Croes:
*Lo haci un inventarisacion di e desaroyonan den e ultimo añanan
ORANJESTAD (AAN): Dialuna mainta den un rueda di prensa Minister di Deporte, mr. Gerlien Croes a informa di varios situacionnan y retonan cu a bin encontra cu nan den e area di deporte. Manera palabra den e acuerdo di gobernacion, lo haci un inventarisacion di e desaroyonan den e ultimo añanan y alaves di e situacion actual a bin encontra documentonan y indicacion cu mester haci un inventarisacion debido den diferente fundacionnan.
For di un documento cu a ser obteni di aña 2018, crea pa e compania PWC, por a saca afo cu desde e tempo ey caba tabata tin indicacion cu tin necesidad urgente pa haci cambio den maneho, inventarisacionan financiero, situacionan di personal den e fundacion, cu nunca a wordo haci. Desde 2018 pa awor, diferente otro situacionnan a presenta den diferente di e fundacionnan cu mester di atencion serio.
Gabinete AVP-Futuro a priminti “Good Governance” y esey ta conta tambe pa fundacionnan cu ta maneha finanza den deporte. Varios di e fundacionnan aki ta ricibi subsidio di Gobierno di Aruba y mester tin trasparencia y claridad si e fondonan aki ta wordo aloca debidamente pa asina logra e metanan stipula.
Banda di e retonan conoci manera e situacion na Simon Antonio, tambe tin reto na Compleho Deportivo Frans Figaroa, unda cu e veld no ta apto pa e weganan tuma luga riba e tereno. Joe Laveist tambe ta actualmente cera. Despues di a identifica mas reto, a encontra suficiente motibo pa inicia cu un audit pa lo cual ta e maneho di e fundacion F.F.D.
E mandatario a sigui bisa cu mas informacion y detayes lo wordo comparti den tur transparencia asina cu e raportnan keda cla. “Cada florin cu e Gobierno aki ta saca for di su caha, ta un florin di e pueblo aki y na final di dia lo cual cu nos ta destina pa comunidad mester wordo destina debidamente, pero tambe e mester verifica si ta logrando su meta”.
Den cuadro di esaki nos ta comunica na comunidad cu e inventarisacion a inicia y ta wordo lidera door di C.A.D. cu mas partner pa asina trata pa acelera e proceso y pa haya un bista cla di tur e desaroyonan di e ultimo añanan den e fundacion menciona.
Minister Croes a termina bisando cu tin hopi mas desaroyo cu lo wordo comparti cu pueblo den e simannan binidero y ta su deber pa informa comunidad di tur lo cual a bin ta encontra. “Mester busca solucion. Pa busca solucion, bo mester tin un bista cla di con e situacion ta di berdad y a base di esey e inventarisacion a inicia den FFD”.
