Indicacion cu negoshi cu suelo di Aruba a bira beerput!

Indicacion cu negoshi cu suelo di Aruba a bira beerput!

ORANJESTAD(AAN)— Aruba ta prepara pa bay eleccion. E caminda pa yega na urna electoral na 2021, a resulta di ta mucho mas serio cu nunca Aruba por a pensa.

E saldo di gobernacion cu a wordo ricibi na 2017, ora e tempestad gubernamental di Mike Eman a termina, a exigi pa habri un caminda nobo pa Aruba, cu for di 2014 Reino a pone bou supervision y a bira e prome paso cu a scapa Aruba for di destruccion total.

Na den un realidad completamente diferente, awe Aruba ta prepara pa bay eligi miembronan nobo di Parlamento.

Hasta den esaki Aruba ta consciente, cu e mester mira kende e ta duna su confiansa pa drenta den Parlamento despues cu e controlador financiero di Aruba, Algemene Rekenkamer Aruba, a publica den un rapport cu e miembronan di Parlamento di AVP no a cumpli cu nan trabou y a permiti Mike Eman haci y deshaci manera e tabata kier.

Placa di Aruba a wordo abusa pero pio a pasa cu e suelo sagrado di Aruba.

Tin tur indicacion hasta den Corte di Husticia, cu negoshi cu suelo di Aruba, a bira un beerput politico cu Evelyn Wever-Croes a cera na 2020 ora el a saca otorgamento di tereno for di man politico.

Ta ora tene na consideracion tambe di e paso politico di firmesa cu Evelyn Wever-Croes a dal ora el a deshaci di metemento di politica den asunto di tereno, e pregunta ta surgi pakico Selene Kock cu awe ta prima donna di AVP, a bay pidi Evelyn Wever-Croes tereno.

Awe tin tur motibo pa puntra si Selene Kock tabata busca fabor politico pa haya tereno of si e kier a crea un trampa pa su opositor politico Evelyn Wever-Croes.

Un pregunta cu sigur mester wordo lansa den e turbulencia politico na Aruba, caminda baila di mascara a termina pa Pueblo a haya informacionnan increibel di loke a pasa cu gobernacion di su pais.

Awor, mientras Corte di Husticia ta atende cu e caso penal Avestruz y funcionarionan hunto cu Minister cu tabata responsabel a cera conoci cu prison, DIARIO ta ricibi mas y mas informacion riba e Cas di Madushi na Noord y e forma cu Marisol Lopez Tromp a regla asunto di tereno pa su ruman muhe, cu ta den directiva di su partido tambe.

DIARIO a ricibi hopi reaccion riba desaroyonan di Marisol Lopez-Tromp y Benny Sevinger. Personanan cu for di tempo cu e tabata riba lista di MEP a pidi pa un tereno y nunca a haya ni tempo di Marisol Lopez-Tromp, ni tempo di Benny Sevinger, tempo di Otmar Oduber, pero awor ta mira ruman di Marisol ta haya dentro di algun dia, ta cuestiona loke a pasa.
Esaki ta indica cu e base democratico di e pais a wordo kibra.

Ora resumi kico a pasa, por conclui cu Evelyn Wever-Croes cu a mira con tres Ministro di Infrastructura tras di otro a atende cu asunto di tereno, a pone punto final tras di metemente di politiconan den asunto di tereno.

Resumen di e realidad di tereno na Aruba na Siglo 2001, ta indica claramente cu na 2020 despues di e teatro di Marisol Lopez Tromp cu e partido POR cu el a duna sosten tur tempo mientras e tabata facilita su ruman Lelicia, Evelyn Wever-Croes a cera un beerput habri na Aruba, ora el a dicidi cu wega politico cu tereno a termina.