ORANJESTAD (AAN): Diaranzon atardi durante presentacion di e rapport anual di 2020 di Corte Comun di Husticia, huez Debby Angela a menciona algun caso interesante cu a resalta na 2020.
Mr. Angela a papia entre otro di e caso Larimar na St. Maarten unda cu e politico TH a wordo condena na 60 luna di prison, pa a tuma casi 4 miyon dollar na soborno(placa bao di mesa) y pa labamento di terenonan.
E consultant cu a fungi como intermediario a haya 36 luna, mientras cu e ex director di un compania cu a wordo acusa di paga placa bao di mesa, labamento di placa y falsificacion di documento a hay 12 luna.
Banda di esaki Angela a indica cu dos otro persona envolvi mester a haci trabaonan comunitario como castigo y un multa di 20 mil florin pa paga.
Esaki pa labamento di dos tereno di e politico.
E huez a menciona tambe un caso remarcable na Corsow, di e baby Imani.
E baby a nace morto y su mayornan kier a dune un nomber toch, pero Censo di Corsow a nenga e peticion aki.
E mayornan a bay corte y nan a gana e caso.
Awor si un baby nace morto, bo tin derecho di dune un nomber.
E huez a papia tambe di e caso sumario di Aruba Off-Road Foundation contra Parke Arikok cu Parke Arikok a gana.
Esaki ta nifica cu por lo pronto vehiculonan ATV no ta wordo permiti di drenta e parke.
Otro caso remarcable cu e huez a menciona ta e caso cu pais Aruba a perde contra parehanan di mesun sexo.
Huez Angela a indica cu esaki ta nifica cu tur pais cu ta forma parti di e tratado ta Europeo pa Derechonan di Ser Humano no ta obliga pa regla cu parehanan di mesun sexo por casa cu otro, pero mirando e tratado, e pais mester ofrece nan un alternativa igual cu matrimonio.
Por ehempel, e asina yama ‘geregistreerde partnerschap’.
E veredicto a menciona cu su pais Aruba no haci esaki pa parehanan di mesun sexo, e pais ta discrimina y ta actua ilegalmente.
