ImSan a firma un CAO nobo cu sindicato AVB

*empleadonan ta haya aumento di salario di 210 florin

 ORANJESTAD (AAN): Diabierna atardi ImSan a firma un CAO nobo cu sindicato AVB.

“Despues di varios aña cu nos a lucha cu e pandemia di COVID y cu tur e efectonan financiero cu e tabata tin riba nos tur, no solamente riba nos hendenan trahando den turismo pero sigur tambe riba tur hende cu ta trahando den cuido di salud, nos a yega na un acuerdo nobo”.

Honestamente a tuma nos hopi tempo pa yega na un situacion financiero di nos isla, cu nos por a sinta na mesa cu representantenan di  sindicato AVB y nos ta hopi orguyoso cu via e deliberacionnan nos a logra toch na un acuerdo cu ta hopi bon pa tur nos empleadonan, segun director di ImSan Joel Rajnherc.

El a sigui bisa cu algo cu tabata bon caba, bira mihor ainda.

Segun Rajnherc no por cumpli semper cu tur deseo, pasobra ImSan tin cu por carge.

Durante e conferencia di prensa presidente di AVB Gina Maduro a gradici e CAO-team y tur otro personanan envolvi incluyendo e director di ImSan, pa e bunita logra cu tur hende a keda satisfecho cune.

El a splica cu a logra mehora tur e beneficionan primario incluyendo indexering, como tambe beneficionan secundario manera e bonusnan.

Segun Maduro, via indexering ta bay tin un aumento di salario pa e empleadonan entrante 1 di Januari di 2024 di 210 florin pa luna.

El a splica cu a mehora tambe e bonusnan, unda cu tin por ehempel un bonus di inflacion di 630 florin cu e empleadonan lo haya 1 biaha, cu ta e luna aki.

Tur empleado a ricibi tambe un bonus di firma, di 150 florin.