Pronosticonan y advertencia di DIARIO a bira advertencia mundial - *Fondo Monetario Internacional ta bati alarma pa situacion peligroso - *Prijs di gasolin y Pandemia Covid-19 ta uni como menasa di inflacion
ORANJESTAD(AAN)—Mescos cu henter mundo, Aruba tambe a cuminsa prepara pa Dianan di Fiesta 2021 cu trece cune e optimismo pa bolbe na celebracion y lubida problemanan serio cu ta sconde na horizonte.
Na un forma continuo informacionnan cu tabata alcansa DIARIO ayera, tabata indica cu DIARIO a asumi su responsabilidad den preparacion di Pueblo di Aruba pa e realidad mundial, cu lo afecta Aruba tambe debi sigur na e aumento mundial di prijsnan cu casi por acepta como un hecho pero tambe e peliger di Covid-19 cu hende kier lubida, pero ta un realidad mas peligroso awor cu mundo kier ignora e berdad.
Ayera Aruba a ricibi e informacion oficial di e forma cu e surgimento di e variante Delta di e Coronavirus nobo, tabata tin pa turismo na Aruba.
DIARIO a base di investigacion continup y consulta cu expertonan riba e diferente terenonan envolvi den e desaroyonan mundial actual, a mustra Pueblo di Aruba, cu mester prepara pa un tempo financieramente dificil pa tur hende na mundo mientras dianan di fiesta ta acerca.
Tur informacion cu tabata sigui drenta ayera for di tur parti di mundo, tabata enfatisa riba e crisis di petroleo, e crisis mundial di energia, cu ta resulta mundialmente den un aumento mas pisa di prijsnan, cu originalmente a wordo calcula.
Aruba for di entrada di e siman nobo, tabata conoci cu e hecho cu atrobe prijs di gasolin a subi na Aruba mescos cu ta e realidad cu tur parti di mundi, cu ta experencia aumento di prijs di gasolin, diesel, kerosin y gas, manera DIARIO ya a trece dilanti.
Esaki ta haci cu prijsnan ta aumenta mientras e demanda pa productonan ta sigui crece den un temporada cu na e parti Noord di mundo, e temporada friu lo aumenta e demanda mundial pa petroleo.
E aumento di prijs ta causa mas problema y ta bira un spiral den cual e e aumento di prijsnan mes ta haci cu prijsnan ta sigui subi y asina conduci na e spiral peligroso di inflacion, cu ta haci cu productonan y servicio ta bira menos pagabel!
E poder di compra di tur hende ta wordo afecta pa inflacion cu ta menasa mundo, cu ayera a ricibi e advertencia di Fondo Monetario Internacional, pa tene e peliger di Covid-19 pa produccion mundial na consideracion y cuminsa tuma medidanan apropia.
E advertencia oficial di IMF ayera na henter mundo, ta cuadra completamente cu e forma cu DIARIO ta mustra Aruba riba e problemanan serio cu ainda Covid-19 por nifica pa mundo, cu atrobe por mira su produccion afecta.
Esaki lo aumenta prijsnan, cu lo afecta e hende, afecta economia manera Aruba tambe mester tene na consideracion.
Na e momentonan aki DIARIO ta en busca di informacion adicional riba e peliger cu un situacion di inflacion serio por bira pa progreso y recuperacion di turismo na Aruba, cu ya a sufri di e variante Delta di e Coronavirus nobo.
Awor IMF mes ta spierta mundo pa tuma medidanan necesario pa evita cu un variante nobo por surgi y paralisa produccion mundial y economia internacional.
Aumento di prijsnan ta afecta e poder di compra di turistanan na nan cas pero tambe ta subi prijs den e sector di turismo.
DIARIO lo sigui informa Aruba, cu mester prepara pa dianan di fiesta di 2021, pero teniendo na cuenta cu mester evita Covid-19 y na mes momento tene na consideracion cu den un tempo ya dificil, prijsnan lo sigui subi.
Expertonan na e momentonan aki hunto cu DIARIO ta studia e impacto cu entrada di un refineria pa Aruba y e proyecto di gas lo por tin concretamente pa Aruba unabez nan bira realidad y conoce desaroyo concreto.
DIARIO lo sigui guia Aruba na forma responsabel den un situacion mundial alarmante manera a wordo publica tambe pa IMF, cu a baha su pronosticonan pa e crecemento economico mundial na 2021.
