Ian Tromp a bira Rey di Tumba Infantil y Jetzenia Martines ta Reina di Tumba Hubenil

Yen di ambiente pa engrandece Tumba

ORANJESTAD (AAN): Diahuebs atardi a tuma lugar den Aruba Entertainment Center na Dakota, e competencia di “Festival di Tumba Infantil y Hubenil” di Carnaval 70.

   Publico basta anima a presenta cu tur sorto di blaas y confetti pa anima nan participante faborito.

   Categoria Infantil: Den categoria Infantil, e Rey di Tumba a bira Ian Tromp cu su nomber artistico ‘Ian Way’, cu a gana cu e cancion “B’a Flecha mi Curason”, cual a ser componi door di Chendell Beaumont y aregla pa Raul Piar.

   Na di 2 lugar a finalisa Lizienne Webb cu su nomber artistico ‘Queen Lizzy’, cu e cancion “Huma di Paz”, componi pa Jersey Isenia, y aregla pa Jersey Isenia y Giovani Mercera.

   Categoria Hubenil: Den categoria Hubenil, Reina di Tumba a bira Jetzenia Martines cu e nomber artistico ‘Queen Shine’, cu su cancion “Den Nos Cos”, componi pa Rygel Isabella y Janiro Eisden, y aregla pa Rygel Isabella.

   Na di 2 lugar a finalisa Caylee Perez cu su nomber artistico ‘Dancing Cay’, kende a gana cu e cancion “Den Dje Para”, componi door di Richard ‘Tattoo’ Quant, y aregla pa Denny Loefstop.

   Na di 3 lugar a finalisa Reanne Ras cu su nomber artistico ‘Reanne’, cu su cancion “Celebra”.  El a ser componi door di Chendell Beaumont y aregla pa Raul Piar.

   Fuera di esey, tabatin premio pa Mas Popular Infantil cu a bay pa Ianway.  Premio pa Mas Popular Hubenil cu a bay pa K-Jay, premio pa Mas Ambiente cu a bay pa K-Jay, y premio pa Best Costume cu a bay pa Reanne.

   E premio pa ‘Rookie of the Year’ a bay pa Queen Shine.