ORANJESTAD (AAN) – Abogado mr. David Kock a declara pa miembronan di prensa, cu durante e Kortgeding cu Gobierno a entama contra e sindicatonan SIMAR Y SEPPA (relaciona cu e 12.6%), puntonan hopi interesante y Importante, a bin dilanti.
Kock a bisa cu, no obstante, mester warda te dia 3 di Maart pa e decision bin. Na prome lugar, por fin a bira cla cu e reduccion di 12.6% a sali di Aruba y despues el a wordo acepta pa Hulanda.
“Pasobra semper tabata tin y tin, un discusion ken eigenlijk a bin cu e propuesta aki, di unda el a bin. Nos a hiba un defensa basta largo pa ilustra pakico si e ‘infringement’ aki riba e derecho di propiedad di e salario di e trahadornan publico, no por wordo hiba indefinidamente, pasobra na 2020 ora e ley aki a bin, e tabata un ley cu ta bisa duidelijk: ‘temporalmente’, mirando e crisis mester a tuma cierto pasonan. Na nos opinion e situacion no ta manera dos aña pasa; gobierno mes, cada bez ta bisa cu nos ta progresando, cu nos a recupera tanto porcentahe, anto e ora ey tambe bo tin cu conta cu e empleado publico”, Abogado mr. David Kock a subraya.
Kock a agrega cu lo ta unico den historia, si Huez mester bin cu algo cu el a bisa cu, por ta, e lo bin cune. “Cu ta bay ta un instruccion pa gobierno, pa bay Hulanda y bin cu un propuesta structural, pa e problemanan cu tin na Aruba. Pues no mas solucionnan djis temporal, un pleister riba e herida, anto si esey mester sosode e ta un hurisprudencia nunca bisto”, mr. David Kock a acentua.
Abogado David Kock ta di opinion cu henter nos sociedad mester di solucion structural y esaki no tin di haber cu politica ni solamente cu empleadonan publico. “Structuralmente, nos problemanan lo mester wordo soluciona, y mester probecha e momento ey e disponibilidad cu tin pa cu esaki”, mr. Kock a conclui.
